Albisteak

Sidenor Basaurin hitzartutako aurreakordioa eskasa da

2022/01/20

Sidenor Basauriko ELAren atal sindikalak ez du onartu La Senda de Ugarte, UGT, USO eta CCOO sindikatuek sinatutako aurreakordioa, nahikoa ez dela iritzita. Atal sindikalak bere nahigabea adierazi nahi du La Senda de Ugarteren sinaduragatik. UGT, USO eta CCOOren sinadura ez da harritzekoa, beste esparru baten alde egiten baitute, plantillak partaidetzarik ez duen eta akordioak enpresak nahi dituenak diren esparru baten alde hain zuzen.

Kontzentrazioak deitu dituzte Basauriko Bridgestone aurrean, azpikontratazio berri baten eta enpleguaren prekarizazioaren aurka

2022/01/18

ELAk eta BUBk kontzentrazioak deitu dituzte Bridgestoneren (Basauri) aurrean urtarrilaren 19, 20 eta 25ean (fabrikako zubian, 13:00etatik 15:00etara), enplegua prekarizatuko duen azpikontratazio berri bat salatzeko. Salatu dutenez, milioi askoko irabaziak izan arren, Bridgestonek zereginak azpikontratatzen jarraitzen du. Batzordeko gehiengo sindikalak (CCOO, UGT) edozein ekintza sindikal egiteari uko egin badio ere, ELAk eta BUBk beharrezkotzat jotzen dute aldarrikatzea eta salatzea. “Onartezina da Basauriko instalazioaren etorkizuna, printzipioz oparoa, enplegua kanpora ateraz eta prekarizatuz eraikitzea”.

ELAk bigarren greba egun bat 
deitu du Bizkaiko erresidentzietan otsailaren 8rako

2022/01/18

Bizkaiko erresidentzietako langileek otsailaren 8rako beste greba egun bat deitu dute, hain zuzen, martxoaren 8a baino hilabete lehenago. Deialdi berri honetan, ELAk berriro aldarrikatuko du lan hitzarmena berritu beharra dagoela, zaintza eredua aldatuko bada. Sindikatuak azaldu duenez, ezinbestekoa da eredua errotik aldatzea, zerbitzuak publifikatzea eta ratioak hobetzea.

ELAk Bizkaiko Metalaren Hitzarmenerako plataforma aurkeztu du

2022/01/11

ELAk Bizkaiko metalgintzako hitzarmenerako aldarrikapenak aurkeztu ditu gaur, urtarrilak 11, Negoziazio Mahaiaren bigarren bileran. Bertan, sindikatuak bere plataforma aurkeztu eta azaldu du, hau da, bere militantziarekin azken hilabeteetan egindako prozesu bateratu baten emaitza. ELAren helburua da sektorean sortzen den aberastasuna modu bidezkoan banatzea, prekaritatea ezabatzea, aurrerapausoak ematea eta Bizkaiko metalgintzan emakumeek jasaten duten diskriminazioaren aurkako neurriak ezartzea.

GUIVISA kondenatu dute Bizkaiko Metalaren Hitzarmena ez betetzeagatik

2022/01/04

Bilboko Lan Arloko 4 zenbakiko Epaitegiak baietsi egin du GUIVISA enpresaren aurka ELAk jarritako demanda, eta Bizkaiko Metalaren Hitzarmena ez betetzeagatik kondenatu du. 2021eko uztailean, ELAk gatazka kolektiboko demanda bat planteatu zuen GUIVISAren aurka, enpresak uko egiten ziolako Bizkaiko Metalaren Hitzarmenean (2019-2021) adostutako igoerak aplikatzeari.

Mobilizazioek jarraitzen dute Transfusio eta Giza Ehunen Euskal Zentroan

2021/12/23

Osakidetzak oraindik ez du mahai gainean jarri irtenbide bat Transfusio eta Giza Ehunen Euskal Zentroko (TGEEZ) kolektiboarentzako. Horregatik, plantilak mobilizatzen jarraitzen du. Abenduaren 23an manifestazioa egin dute Galdakao-Usansoloko Ospitalean, Osakidetzak bere eskaerei erantzun gabe jarraitzen duela salatzeko.

ELAk Bizkaiko bulegoen hitzarmena berreskuratzea proposatuko du

2021/12/21

ELAk Bizkaiko bulegoen hitzarmena berreskuratzea proposatuko du 2022ko urtarrilaren 13rako aurreikusitako bileran. Hain zuzen ere, bihar, abenduak 22, 8 urte beteko dira hitzarmen horrek indarraldia galdu eta aplikatzeari utzi zionetik. Izan ere, 2012an PPk lan-erreforma egin zuenetik, CEBEK patronalak hitzarmenaren aurreraeragina amaitu arte itxaron besterik ez zuen egin. Ondorioz, 8 urte hauetan, langileek soldata-izozteak jasan dituzte eta, batez beste, 10.000 euro galdu ditu langile bakoitzak. Hala ere, patronalak ukatu arren, enpresek krisiaren urterik gogorrenetan hitzarmena aplikatzen jarraitu zutela ziurtatu du ELAk, eta, beraz, ezinbestekotzat jo du sektoreko 28.000 pertsonen baldintzak behingoz arautzea. “Hitzarmen hori egon badago, eta enpresek kontratu berrietan ere aplikatzen jarraitzen dute. Erregularizatzeko ordua da”, laburbildu du sindikatuak.

Jarraipen zabala izan du Bizkaiko autoeskolateko astebeteko grebak

2021/12/17

Gaur, abenduak 17, abendu honetan deitutako 5 greba egunei amaiera eman zaie. Sektoreko langileek egiten duten hogeita laugarren greba eguna da, ekainean mobilizazioen eta greben dinamika martxan jartzea beste aukerarik izan ez zutenetik, hitzarmenaren negoziazioaren blokeoa dela eta. ELAk APAVI eta autoeskola guztiei eskatu die mahai gainean proposamenak jar ditzatela adostasunetan aurrera egiteko eta, horrela, gatazka bideratzeko. Bestela, mobilizazioek eta borroka sindikalak jarraituko dute.

ELAk, LABek eta ESK-k Bizkaiko eraikin eta lokalen garbiketa sektorean soldata arrakala ezabatzea exijitu dute

2021/12/16

ELAk, LABek eta ESK-k Bizkaiko eraikin eta lokalen garbiketarako hitzarmena defendatzeko manifestazioa egin dute Sestaoko Udaletxetik Portugaletera. Azaroaren 18an Basaurin hasitako mobilizazioekin jarraitzen dute, “sektore feminizatua, prekarizatua eta, ia beti, ikusezina” dela salatzeko. Hain zuzen, negoziazio honen gakoetako bat da sektoreko langileek jasaten duten soldata arrakala ezabatzea da -kale garbitzaileek baino %40 gutxiago kobratzen dute-, eta haien soldatak gutxienez 1.200 eurokoak izatea, 15 ordainsaritan. 11:15ean abiatu dira langileak Sestaoko Udaletxetik Portugaletera. Hurrengo mobilizazioa abenduaren 22an egingo da, Bilbon. Sindikatuek salatu dutenez, patronalak ez dauka sektorea duintzeko borondaterik.

Olentzerok 'prekaritatearen gutunak' banatu ditu Bizkaiko Foru Aldundian, Bizkaiko erresidentzietako egoera salatzeko

2021/12/14

Olentzerok bat egin du gaur, abenduak 14, ELAko Bizkaiko erresidentzietako langileek deitutako greba egunarekin. Bizkaiko Foru Aldundiaren aurrean, eta kamiseta berdeekin jantzitako langileek lagunduta, Olentzerok gutunak banatu dizkie ordezkari politikoei, zahar egoitzetako langileek pairatzen duten prekaritatea azaltzeko. ELAk gogorarazi duenez, azken urte eta erdian egindako 10 negoziazio mahaietan, patronalak eta Aldundiak soldatak izoztearen, lanaldi partzialekin jarraitzearen eta langileak lehen egunetik ez ordezkatzearen aldeko apustua egin dute, besteak beste, beharginen eta zerbitzuaren kalitatearen kaltetan; hori guztia Bizkaiko Foru Aldundiak GESCA, Lares eta Elbe patronalentzat 255 milioiko aurrekontu partida onartu duenean. “Diru publikoa eman zaie, baina diru hori ez da erabiliko erresidentzietan lan egiten duten eta bizi diren pertsonen lan eta bizi baldintzak hobetzeko, negoziazio mahaietan ikusi den bezala”.

Abenduaren 13tik 17ra, greba-egun berriak Bizkaiko autoeskoletan, patronalaren erantzunik ezaren aurrean

2021/12/13

Gaur, abenduak 13, Bizkaiko autoeskoletako langileak beste greba egun bat egiten ari dira. Greba egun txanda beri hau luzatuko da abenduaren 17ra arte. Izan ere, ELAk deituta ostegunean egindako negoziazio mahaian, APAVI patronalak ez zion erantzun ELAk duela hilabete baino gehiago planteatutako kontraproposamenari. Lehen jardunaldi hau jarraipen zabala izaten ari da. Bilbon auto-karabana batekin hasi da jardunaldia, Artxandan kontzentrazioa eginez, eta Barakaldon jarraitu du. Arratsaldean mobilizazioek segida izango dute, kontzentrazio gehiagorekin.

Bizkaiko metaleko militanteen asanblada

2021/12/10

Abenduaren 10ean Bizkaiko metaleko ELAko ordezkarien batzarra egin da. Helburua 2022ko urtarrilaren 11n Metalaren Hitzarmenaren Negoziazio Mahaian aurkeztuko den plataforma aurkeztea, partekatzea eta eztabaidatzea izan da. Datozen egunetan, militanteen ekarpenekin osatuko da plataforma.

Greba Galdakaoko Transfusio eta Giza Ehunen Euskal Zentroan

2021/12/09

Hainbat hilabetetako mobilizazioen ondoren, non langileek modu masiboan parte hartu duten, Osakidetzak uko egiten dio zentroko langileek jasaten duten soldata-diskriminazioarekin amaitzeari. Horrenbestez, Galdakaoko Transfusio eta Giza Ehunen Euskal Zentroko (TGEEZ) langileek greba deitu dute abenduaren 9rako eta 10erako.

Bizkaiko zahar etxeetako 5.000 langileren grebarako eskubidea errespetatzeko eskatu dio ELAk Eusko Jaurlaritzari

2021/12/07

Bizkaiko zahar etxeetako langileek elkarretaratzea egin dute gaur, abenduak 7, Eusko Jaurlaritzaren Bilboko egoitzaren aurrean, abenduaren 14ko greba erregistroarekin bat eginez. Bertan, grebarako eskubidea errespetatzeko eskatu dute. Hala, ELAk adierazi du Eusko Jaurlaritzak % 100eko gutxieneko zerbitzuak dekretatzen baditu -Gipuzkoako erresidentzien greban gertatzen den bezala-, sektoreko 5.000 langileren grebarako eskubidea urratuko duela eta erresidentzietako egiturazko arazoak handituko dituela, “patronalaren eta aldundiaren interesetara makurtuz”.

CCOO, UGT eta USOk Sidenorren sinatutako akordio markoak zuzendaritzari bakarrik egingo dio mesede

2021/12/07

Sidenorreko zuzendaritzak eta CCOO, UGT eta USOk sinatutako esparru akordioa errefusatu du ELAk, langileak are gehiago pobretuko dituelako, enpresaren mesedetan. ELAk hasieratik iragarri zuen Estatuko sindikatuek esparru akordio berri bat sinatuko zutela zuzendaritzak planteatzen zituen edukiekin. Sindikatuak deitoratu duenez, CCOO, UGT eta USOk negoziazioa gogorra izan denaren irudia zabaldu nahi izan badute ere, zuzendaritzak planteatzen zituen edukiak sinatu dituzte, besterik ez.

Artiach enpresako langileek 4 orduko lanuzteak egingo dituzte hitzarmena defendatzeko

2021/12/06

Orozkoko Galletas Artiacheko enpresa-batzordearen gehiengoak ( ELA, LAB eta ESK) egunean 4 orduko lanuzteak deitu ditu datozen 3 asteetan (abenduaren 23ra arte), lan-baldintzak hobetuko dituen eta zuzendaritzak ezarri nahi dituen murrizketak jasoko ez dituen enpresa-hitzarmen baten alde. Hitzarmenaren negoziazio-mahaiaren hainbat bileraren ondoren, Artiacheko zuzendaritzak soldatak izoztu, plusak eta antzinatasuna murriztu, soldata-eskala desberdinak sortu eta lanaldia eta malgutasuna handitu nahi ditu. Eta hori guztia, nahiz eta azken 3 urteetan 20 milioi eurotik gorako etekinak lortu dituen.

Glovoko langileen kontratuen izaera laborala defendatzeko kontzentrazioa

2021/11/30

ELA elkarretaratzea egin du Gasteizko Lan Arloko Epaitegiaren aurrean, Glovoko langileei babesa eta elkartasuna adierazteko. Izan ere, gaur egin da Arabako lehenengo epaiketa kolektiboa euren kontratuen izaera laborala aitortzeko. Urrats garrantzitsua da ehunka langileren lan baldintzak erregularizatzeko.

Minbizia eragin dezakeen produktu bat erretiratuko du Metro Bilbaok ELAren salaketen ondorioz

2021/11/30

EAEko Justizia Auzitegi Nagusiak arrazoia eman dio ELAri, eta onartu du Metro Bilbaoko hainbat langile eta erabiltzaile minbizia eragin dezakeen produktu batekin, silize kristalinoaren harearekin, harremanean izan direla, eta baztertzeko agindu du. Epai aitzindaria da, lehen aldiz deklaratu baitu epaitegi batek produktu hori pertsonen osasunerako kaltegarria dela. ELAk Metro Bilbaoko langileen osasunari dagokionez epaiak eragindako ondorioak aztertuko ditu eta, era berean, Metro Bilbaori eskatu premiaz neurriak har ditzala pertsona gehiago ez kaltetzeko eta indarrean dagoen legedian ezarritako prebentzio printzipioei men egiteko.

Abenduaren 13tik 17ra, Bizkaiko autoeskoletako greba txanda berria

2021/11/30

ELAk beste bost greba-egun deitu ditu Bizkaiko autoeskoletan abenduaren 13, 14, 15, 16 eta 17rako, sindikatuaren azken hitzarmen-proposamenari patronalak erantzunik eman ez diolako. Era berean, ELAk negoziazio mahaiaren bilera deitu du abenduaren 9rako LHKren egoitzan eta gatazka bideratzeko proposamen berri batekin joateko eskatu dio patronalari.

Bizkaiko metalaren negoziazio batzordea eratu da

2021/11/29

Azaroaren 29an, ELAren ekimenez -sektoreko sindikatu nagusia da-, Bizkaiko metalaren sektoreko hitzarmenaren negoziazio mahaia eratu da. Hurrengo bilera 2022ko urtarrilaren 11n izango da, eta bertan, aldeek beren aldarrikapenak aurkeztuko dituzte. ELAk iragarri duenez, datozen asteetan sektoreko militanteekin bilduko da bere aldarrikapenak eztabaidatu, forma eman eta zehazteko.

ELAk greba deitu du abenduaren 14an Bizkaiko erresidentzietan

2021/11/29

ELAk greba deitu du abenduaren 14an Bizkaiko zahar egoitzetan, patronalek eta Bizkaiko Foru Aldundiak ratioetan eta lan baldintzetan hobekuntzak negoziatzeari uko egin diotelako. Sindikatuaren esanetan, Aldundiaren propaganda instituzionalaz haratago, kaleratzeak, zerbitzuen pribatizazioa, langilerik eza eta lanaldi partzialeko kontratuak dira, besteak beste, zerbitzuaren kalitatearen gainbehera eta lan karga jasanezinak eragin dituztenak. Gauzak horrela, abenduaren 14an, 11:30ean, Bizkaiko zahar etxeetako langileek elkarretaratzea egingo dute BFAren aurrean, grebaren lehen egunari hasiera emateko.

Funtsezko langileak falta dira Metro Bilbaon

2021/11/15

Publikoaren arreta eta gorabeheretako lehen urratsa kudeatzen duten langileen hutsuneak ez estaltzeak bidaiariei eta geltokietako segurtasunari erasaten diela salatu du ELAk. Horregatik, ELAk Bizkaiko Garraio Partzuergoari eta Metro Bilbaori eskatu die lanpostu guztiak osa daitezela, zerbitzuaren kalitatea ziurtatzeko eta arrisku egoerak saihesteko.

A11 #NoNosVendáisEnMadrid

2021/11/12

Pentsio eta lan erreforma indargabetzeko mezuez bete ditu kaleak ELAk, 'Asko dago jokoan! Pentsioetan murrizketarik ez! Lan erreforma indargabetu!' lelodun kartelak ipiniz.

ELAk Bizkaiko Metalaren negoziazio mahaia deitu du

2021/11/12

ELAk, sektoreko sindikatu nagusiak, Bizkaiko Metalaren negoziazio-mahaia deitu du azarorako. Bizkaiko industria siderometalurgikoaren hitzarmenaren indarraldia 2021eko abenduaren 31n bukatuko da. Sektorearen prekaritateari aurre egingo dioten eduki berriak sartu nahi ditu sindikatuak. Plataforma aurkeztu aurretik, bere militantzia bilduko du datozen asteetan, aldarrikapenak partekatu eta eztabaidatzeko.