Zaindu nazazu (gutxienez) bi orduz!

Adinekoen zaintzari dedikatzen zaizkion denborak eta ratioak (zaintzaile kopurua pertsona bakoitzeko) neurtu berri ditu ELAk, kalitate asistentziala hobetzeko proposamenak egiteko. Zaindu nazazu (gutxienez) bi orduz leloa aukeratu du kanpainarako, gaur egun, erabiltzaile bakoitzari, bataz beste, bi ordu ere eskaintzen ez zaizkiola agerian uzteko asmoz. Herrialdez herrialde egindako ikerketak zifra latzak utzi dizkigu: Bizkaian 60 minutu baino ez zaizkio eskaintzen adineko bakoitzari egunean; Araban eta Nafarroan 88; eta Gipuzkoan 92.

Aldarrikapenak oinarrizkoak dira: erabiltzaile bakoitzari, gutxienez, egunean bi ordu dedikatzea. Hauek aldarrikapen zehatzak: zaintzaileak bi ordu egotea pertsona bakoitzeko, gutxienez; erizain bat egotea 24 orduz, garbitzaile kopurua %53 gehitzea eta sukaldari bat egotea 50 egoiliarrentzat.

Bizkaian, adibidez, sukaldean pertsona bakarra dago 150 menu egiteko, menu bereziak gainera: diabetesa duenarentzat, hipokalorikoa... Are gehiago, kontuan hartu behar da garbikuntza, erizaintza eta sukaldaritza kategoriak lehenengo aldiz hartu direla aintzat, behintzat kuantifikatu, egun ez baitaude ratioak ezarrita sektore horietan.