LANGILERIA ANTOLATU, GIZARTEA ERALDATU

ELAren 16. Kongresu konfederala, ekainaren 2an eta 3an

2025/05/30
ELAk ekainaren 2an eta 3an ospatuko du 16. Kongresua, Bilboko Euskalduna Jauregian, ‘Langileria antolatu, gizartea eraldatu' lelopean. Leloak berak adierazten duen bezala, helburua langile klasea eragile aktibo eta eraldatzaile gisa antolatzea da, gizarte justuago bat lortzeko. Izan ere, ‘Sindikatu gehiago, bizitza gehiago 'da ELAk lau urteko hitzordu honetarako aukeratu duen leloaren bigarren zatia. Ekitaldi honetan, ponentzia eta kudeaketa txostena eztabaidatu eta bozkatuko dira, datozen lau urteetarako lan ildoak definitzeko. Batzorde Exekutibo berria ere aukeratuko da, eta Mitxel Lakuntza izango da berriro idazkari nagusi izateko hautagaia. Gainera, Eibarren egin zen 1976ko III. Kongresuan onartutako printzipioak eguneratzeko aukera baliatuko du sindikatuak.

Kongresua zenbakitan

Sindikatuaren estatutuen arabera, 736 ordezkarik eztabaidatuko dute Batzorde Eragileak aurkeztutako kudeaketa txostena, bai eta hurrengo lau urteetako lan sindikalerako ildo nagusiak definituko dituen Ponentzia ere.

736 ordezkarietatik 344 gizonak izango dira eta 392 emakumeak ( % 53,2). Horrek agerian uzten du ELAk genero berdintasunaren alde egiten duen apustua. 2008ko kongresuan emakumeen parte-hartzea % 30,3koa izan zen; 2013an, % 33,4koa; 2017an, % 42,8koa; eta 2021ean, % 47,2koa.

Batzorde Eragile berrirako proposamena

Datozen lau urteetan Batzorde Eragilea osatuko duten pertsonak eta euren funtzioak aukeratzeko unea da Kongresua. Mahai gainean dagoen proposamenak hiru pertsona berri sartzea dakar: Ane Bilbao Alzelai (Gasteiz, 1993), Luis Fernández Centeno (Iruña, 1973) eta Unai Oñederara Egaña (Donostia, 1973). Horregatik, Kongresuaren babesa jasoz gero, Batzorde Eragile parekidea izango da (6 emakume eta 6 gizon): Mitxel Lakuntza Vicario (idazkari nagusia), Amaia Muñoa Capron-Manieux (idazkari nagusiaren ondokoa). Nazioartekoa), Ane Bilbao Alzelai (Zerbitzu Juridikoak), Luis Fernández Centeno (Sindikalizazioa, Militantzia, Ekintza konfederalak), Leire Gallego López de Goikoetxea (Genero berdintasunerako politikak, Gizarte ekintza, Migrazio politikak), Iván Giménez Gil (Komunikazioa), Pello Igeregi Santamaría (Negoziazio kolektiboa, Lan Osasuna, Euskara), Alazne Mantxola Mintegi (Diruzaintza), Aitor Murgia Esteve (Ikerketa Kabinetea, Gizarte Politikak, Ingurumena), Unai Oñederra Egaña (Prestakuntza, Iparraldea, Estrategia subiranista), Leire Txakartegi Iramategi (Erakundea), Ane Miren Zelaia Arieta-Araunabeña (Afiliazioa, Hauteskunde Sindikalak).

Kongresuaren informazioa

Kongresuak bi egun iraungo du, lehena goiz eta arratsaldez eta bigarrena goizez. Ekainaren 2ko inaugurazio saioa goizeko 9:00etan hasi eta 17:45ak aldera amaituko da. Lehenengo egunean azken lau urteei buruzko balorazioa egingo da eta kudeaketa txostena eta txosten ekonomikoa aletuko dira. Era berean, Printzipioak berritzeko bozketa egingo da. Bigarren jardunaldian, Ponentzia eztabaidatuko da eta Batzorde Eragile berria aukeratuko da. Gonbidatutako erakundeek ere parte hartuko dute egun horretan (LAB, Intersindical, CIG).

Datu horiek guztiak eta beste berrikuntza batzuk eskuragarri egongo dira ELAren sare sozialetan eta webgune honetan: https://www.ela.eus/eu/kongresua

Zuzeneko seinalea egongo da, eta webgune beraren bidez jarraitu ahal izango da.