ELAren XIV. Kongresuan parte-hartu duten ordezkariek Adolfo Muñoz Txiki hautatu dute datozen lau urteetan sindikatuko idazkari nagusi izateko, aldeko bozen %87,50 lortuta. Muñoz buru zuen zerrenda izan da aurkeztu den bakarra.

Kongresuan parte-hartzen diren ordezkari sindikalek aho batez onartu dute Nazio Batzordeak aurkeztutako Ponentzia Orokorra. Ponentziak datozen urteetan ELAren ildo estrategikoak zehazten ditu. Oharra: Eztabaidatu eta bozkatu den Ponentzia Orokorra webgune honetan bertan eskuratu liteke.

Goizeko 09:00tan hasi da ELAren XIV. Kongresu Konfederaleko bigarren jardunaldia. Bigarren eta azken egun honek bi une nagusi izango ditu. Lehenengoa Ponentzia Orokorraren eztabaida izango da; hau da, ELAk hurrengo urteetan jarraituko dituen ildo estrategikoak. Bigarren une garrantzitsua Batzorde Eragile berriaren hautaketa izango da; hots, hurrengo Kongresua arte sindikatuaren zuzendaritzaz arduratuko den lan-taldea.

Kongresuko lehen egun honi amaiera emateko ELAk Bakearen Artisauei bere esker ona adierazi nahi izan die. Gure sindikatuak lagun hauek egindako lan paregabea eskertu nahi du. Omendu diren artisau guztien artean gure sindikatuko militante Txetx Etcheverryk aipamen berezia izango du.

Kongresuan parte-hartzeko eskubidea duten 736 delegatu-ordezkariek aho batez onartu dute Batzorde Eragileak aurkeztutako kudeaketa txostena. Goizean Adolfo Muñoz eta Amaia Muñoa, –idazkari nagusia eta idazkari nagusiaren-albokoa, hurrenez hurren–, izan dira kudeaketa txostena aurkezteaz arduratu diren lagunak.