ELAk salatu du Donostiako Pilarreko klinikaren kudeaketa txarra eta itxiera

2014/11/10

Pilarreko Klinikak (IMQ taldea) jarduera amaitzea eta instalazioak ixtea erabaki du. Horren berri prentsaren bidez iragarri zuen iragan astean. Gero, Zuzendaritzak Enpresa Batzordeari deitu zion itxiera-erabakia eta kontsulta-aldiaren hasiera jakinarazteko. Gaur lehen mbilizazioa burutu dute langileek itxiera salatzeko.

Pilarreko Klinika, IMQren menpekoa, enpresa-kudeaketa txarraren adibide garbia da. Klinika horretan, urtetan etekin itzelak sortu arren, ez da aipatzeko moduko inbertsiorik egin, oso errentagarriak ziren zerbitzuak kendu izan dituzte, eta aldiz batere emankorrak ez ziren soldata-kostu handiak gehituz joan dira, Osakidetzako kargudun ohiak kontratatu baitituzte. Hori dela-eta, zenbait lanpostu bikoiztu da, eta emaitza-kontua zamatu.

Nolanahi ere, gogoratu beharrekoa da Pilarreko Klinikaren plantillak, dagoeneko, 2 itxiera-EEE eta %8 eta %20 bitarteko soldata-jaitsiera jasan behar izan dituela, enpleguari eustearen trukean. Berriz ere ikusi ahal izan dugu enpresa-talde batzuk lan-erreformaz baliatzen direla, lan-baldintzak jaisteko, etekinak ugaltzeko, eta gero langileak merkeago kaleratzeko.

Klinikako enplegatuak emakumeak dira gehienbat, dituzten soldatak eta lan-baldintzak oso prekarioak dira, eta haietako askok ez dute benetako aukerarik izango lan-merkatura itzultzeko, behin lanpostua galduta. Azken batean, itzal handiko giza drama baten aurrean gaude.