Administrazioei eskatzen diete Covid-19ko testa egin diezaietela langile eta erabiltzaile guztiei, horrela segurtasun-baldintzetan lan egiten jarraitu ahal izateko.

Michelinek bere lan-jarduerara pixkanaka itzultzeko asmoa iragarri ostean, zuzendaritzaren alde bakarreko erabakia dela azpimarratzeaz gain, ELAk langile guztien osasuna eta segurtasuna bermatzeko beharrezkoak diren neurriak martxan jartzeko eta betetzeko eskatu du. ELAk gogorarazi du zuzendaritza dela neurri horien eraginkortasunaren eta betetzearen erantzule bakarra, eta aurreratu du langileen osasuna eta segurtasuna arriskuan jar ez daitezen arretaz jarraituko duela itzulera.

INDESAko zuzendaritzak ERTE bat eskatu zuen martxoaren 25ean. Horren bidez 347 langileri kontratua etetea proposatu dute, koronabirusaren osasun-alarmak dirauen artean. Eteteko diren postuak funtsezko zerbitzuen izendapenean sartzen ez direnak dira. Zuzendaritzaren proposamenaren arabera ERTEaren bidez langabeziara doazenen soldatak %100eraino osatzea onartzen da. INDESA enplegu-zentro berezi bat da, sozietate publiko gisa eratua, %100ean publikoa, Arabako Aldundiaren menpekoa, non 850 langile aritzen diren, haietako asko funtsezko jardueretan, eta lan-baldintzetan hobetzeko tarte handia dutenak, ez baitira iristen ezta mileurista izatera ere.

Supermerkatuen hornidura faltak beldurra sortu zuen eta ondorioz, etengabe hazten joan dira salmentak. Alabaina, Mercadonak, Basauriko saltokiko bi langile eta Gasteizko zentro logistikoko hiru, arrazoirik gabe kaleratu ditu. ELAk horrelako kaleratzerik onartuko ez duela aurreratu ondoren, enpresak lan-karga onartezinak eta lanaldi amaigabeak bere gain hartzen dituen plantilla otzantzea helburu duela salatu du, eta horregatik, ordutegian eta lanaldietan etengabeko aldaketak egiten ari dela. Hori guztia, enpresaren beharren arabera eta langile bakoitzaren egoera pertsonala kontuan hartu gabe.

Arabako Lan Ordezkaritzak enpleguaren erregulazioko espedientea onetsi du, ezinbesteko arrazoiengatik, TUVISA sozietate publikoko gidarien lanaldia eta soldata murrizteko. ELAk gatazka kolektiboaren salaketa aurkeztea erabaki du.

ELAk Mercedesen lortutako akordioa modu positiboan baloratzen du, krisi honen hasieran langileek definitu zituzten lehentasunak betetzen dituelako: langileriaren osasunaren zaintza eta babesa. Akordioak, gainera, lan baldintzak hobetzen ditu.

Osakidetzako zuzendaritzak Igurco egoitza, “Clínica Álava” zaharra, berehala husteko agindu zuen atzo, zentroa COVID-19ko gaixoentzat bideratzeko. Erabaki horrek, zuzena izan edo ez, agerian uzten du Osakidetzaren aldetik ibilbide-orri bat falta dela osasun-krisiari aurre egiteko, eta bere ekintzak inprobisatzen ari dela, modu planifikatu eta ordenatu batean gauzatu beharrean.