ELAk salatu du Eusko Jaurlaritzaren Enplegu Publikoaren Legeak interes pribatuei mesede egingo diela eta langileen prekaritatea areagotuko duela

Eusko Jaurlaritzak aurkeztutako proiektu honek euskal sektore publikoaren arazo nagusiak diren behin-behinekotasuna, pribatizazioa, enpleguaren suntsiketa eta murrizketak betikotuko ditu.
*Plantillaren eta zerbitzu publikoak menderatzeko helburuarekin, zuzendaritza-kide publikoen figura sortu da. Figura horrek langileen jarduera, lan-baldintzak, diziplina-neurriak hartzea, mugikortasun geografikoak eta/edo funtzionalak erabakitzea eta abar baldintzatuko ditu.
*Pribatizazio gehiago: Ez du mugarik zehazten zerbitzu publikoak kanpora ateratzeko eta pribatizatzeko.
*Behin-behinekotasuna sektore publikoaren arazo nagusietako bat den arren, testuan ez dago hura amaitzeko tresnarik, Europar Batasuneko Justizia Auzitegiak ezarritakoa urratuz. Era berean, aldi baterako langileak baztertzen ditu karrera profesionalean, baimenetan eta abarretan.
*Estatuko legeriaren mende dago, eta Gernikako Estatutuan aitortutako eskumenak ere ez ditu aintzat hartzen. Gogoratu behar da aurkeztutako testua PSE-PPen Gobernuarena dela.
*Mendetasuna ziurtatzeko ordainsari aldakorra: Administrazioak lan-baldintzak bere kabuz erabakitzeko duen ahalmena indartzen du, karrera profesionala edo jardunaren ebaluazioa bezalako tresnen bidez.
*Negoziazio kolektiboa: Ez da inolako bermerik ezartzen administrazioek akordioak bete behar izan ditzaten. Horrek baliorik gabe uzten du negoziazio kolektiborako eskubidea.
Lehen aldiz arautzen da langile publikoen etika- eta jokabide-kode bat, enplegatu publikoaren izaera bera auzitan jartzen duena; kode horren izateko arrazoia objektibotasunean eta erabakiak hartzeko independentzia dira.
Ez dago zerbitzu publikoak eta langileak euskalduntzearen aldeko benetako apusturik.
EAEtik kanpoko pertsonek Administrazioan lan egiteko aukerari dagokionez, ELAk uko egin dio proposamen horri, hainbat arrazoirengatik: kolektibo jakin batzuetara mugatzen da, eta horrek diskriminazioa dakar beste lanbide-profil batzuk dituzten etorkin guztientzat; horrela, Eusko Jaurlaritzak profilen eskasia-arazo bat konpondu nahi du, lan-baldintza eskasetatik zuzenean eratortzen dena. Gainera, neurri horrek kualifikatutako profesionalak euren jatorrizko herrialdeak deskapitalizatzen ditu, bertan lan egitea oso beharrezkoa den horietan trebatutako profesionalek beren lanbide-jarduera utziko baitute.

Beraz, ELAk Eusko Legebiltzarreko ordezkariei eskatu die osoko bilkuran testua atzera botatzeko eta benetako negoziazio bat hasteko, eragile sozial, sindikal eta herritar guztien parte-hartzearekin, honako eduki hauek izango dituen lege bat bultza dezaten:

*Estatuarekiko mendekotasunik gabea, euskalduna, independentea eta kontrol sozialekoa, zerbitzu publiko, unibertsal, doako eta kalitatezkoak bermatzeko, interes orokorrari erantzungo diotenak, eta ez interes alderdikoiei eta kapitalari.
*Funtzio publikoa enplegatu publikoek beteko dutela bermatzea, zerbitzu gehiago pribatizatzea eragoztea eta azpikontratatutako zerbitzuak arlo publikora itzultzea, enpleguari eutsiko zaiola bermatuta.
*Sektore publikoko milaka langileen enplegua sendotzea. Eta egungo egoera errepika ez dadin neurriak sartzea.
*Murrizketa sistematikorik gabeko lan-baldintzak bermatzea, mugiezintasunean eta independentzian oinarrituak, negoziazio kolektibo errealerako eskubidearekin, kanpoko esku-sartzerik eta alde bakarreko inposaketarik gabe.
*Genero-berdintasunaren alde egitea eta dagoen soldata-arrakala amaitzea.
*Euskararen arloan, euskaraz bizitzeko eta lan egiteko eskubidea bermatuko duen lege bat.