Osakidetzako langileen kontzentrazioak Lehen Mailako Arretarako baliabide gehiago eskatzeko

2020/12/30
Osakidetzako langileek elkarretaratzea egin dute gaur goizean EAEko hiru hiriburuetan (Donostian: Donostia Ospitalean, Gasteizen: Santiago Ospitalean eta Bilbon: Deustuko anbulategian), Osasun Sailari langile eta baliabide gehiago eskatzeko. ELA, SATSE, LAB, CCOO, UGT eta ESK kezkatuta daude Lehen Mailako Arretak baliabide gutxi dituelako eta kolapso arriskua dagoelako COVID txertoari aurre egiteko orduan.

Era berean, sindikatu horiek Osakidetzaren egiturazko arazo larriei irtenbidea emateko benetako negoziazioa eta edukiak eskatu dizkiote Osasun sailburuari. Salatu dutenez, abenduaren 29an egindako bilera telematikoan, beste behin ere, egiaztatu dute asmo onen adierazpenetatik haratago ez dagoela mahai gainean inolako neurririk Osakidetzak dituen egiturazko arazoei irtenbidea emateko.


ELA, SATSE, LAB, CCOO, UGT eta ESK sindikatuek aurrekontu partida bat eskatu dute osasun publikorako, EBko batez bestekoarekin parekatzeko, eta osasun arloko aurrekontuaren % 25 lehen mailako arretara bideratzeko; langile kopurua handitzeko, ezkutuko enpleguak iruzurrean sartuta; behin-behineko langileak finkatzeko; murrizketa guztiak lehengoratzeko; pribatizatutako zerbitzuak lehengoratzeko; eta osasuna eta segurtasuna bermatzeko neurriak hartzeko.


Azkenik, sindikatuek aurreratu dute mobilizazioekin eta grebekin jarraituko dutela, bide horretan urratsak eman arte.