Aita Menniko langileek mobilizazioei ekin diete berriro, enpresaren erantzunik jaso ez dutelako
ELAk mobilizazioak indartuko ditu gaurtik, irailak 16, Aita Mennin. Ekainean, enpresa-batzordeak proposamen bat aurkeztu zion enpresako zuzendaritzari, negoziazioarekin aurrera egiteko. Hala ere, oraindik ez du negoziatzeko inolako borondaterik erakutsi. Aina Menniko langileek bost greba egun egin dituzte euren hitzarmenaren alde, eta hiru urte daramatzate langileen lan-baldintzak hobetzeko borrokan. ELAk, berriz ere, negoziatzeko borondatea adierazi du, eta gatazka horri amaiera emateko eskatu du. Mugimendurik ez badago, mobilizazioak eta greba egunak areagotuko dituztela iragarri du.
Sindikatuak azpimarratu duenez, kaudimen ekonomiko handiko enpresa da, milioi askoko irabaziak ditu urtero, diru publikoarekin finantzatzen da eta euskal osasun sisteman ezinbesteko papera betetzen du.
"Bitartean, Aita Menni ospitaleko langileen baldintzak guztiz eskasak dira: langile gehienek lanaldi partzialak dituzte, egutegi jasanezinak eta, batez ere, langile falta handia dago". ELAk azpimarratu du langileek oso uda zaila bizi izan dutela: bajak, bete ez diren lanpostuak gainerakoei lan-karga gehituz, erizain falta eta titulazio homologaturik gabe kontratatutako erizain laguntzaile ugari. "Horrekin guztiarekin ospitaleko pazienteen arreta eta zaintza okertu da. Ezin dugu ahaztu bereziki ahulak diren pazienteez ari garela ", esan dute.