ELAk mobilizazioekin jarraituko du Aita Mennin, enpresak pausorik ematen ez badu

2022/02/11
Aita Menniko txanda honetako azken greba Arrasaten egindako manifestazio batekin amaitu da. Orain arte 18 greba egun izan dira, ELAk balorazio positiboa egin du, eta iragarri du mobilizazioekin jarraituko duela enpresak urratsik egiten ez badu. Sindikatuak enpresako zuzendaritzak grebaren iragarpenaren aurrean eta grebak iraun bitartean izan duen jarrera "errepresiboa" salatu. Ziurtatu du beldurra eta presioa eragin diela langileei. Aita Mennin ez dute hitzarmena berritu 2017tik, lan karga handiak dituzte eta ez dituzte pazienteak behar bezala artatzen (medikuak, erizainak eta erizaintzako laguntzaileak falta dira, batez ere). Gutxieneko zerbitzuak, gainera, gehigizkoak izan dira eta grebarako eskubidea urratu dute. ELAk bilera eskatu dio Eusko Jaurlaritzako Osasun Sailari, baina ez du erantzunik jaso.

"Onartezina da greba egun batean ohiko egunean baino langile gehiago egotea", azpimarratu du ELAk. Unitate bakoitzeko langile batek bakarrik egin dezake greba; EAEko Aita Menniren kanpoko zentroetan ez dute grebarako eskubiderik ere, nahiz eta atxikimendua adierazi. Halaber, gutxieneko zerbitzuei buruzko dekretuan langileek egin beharreko lanak jasotzen dira, orain arte ez bezala. Lehen, zuzeneko arretarekin lotutako zereginak bakarrik egin behar ziren; orain, berriz, terapiak onartzen dira, baita deiak ere...

Gogoratu behar da Aita Mennik zerbitzu bat ematen duela Osakidetzak Gipuzkoan eskaintzen ez duen osasun mentalaren esparruan. ELAk azpimarratu du osasunaren pribatizazioak langileen prekarizazioa eta pazienteen arretarik eza dakarrela, Aita Mennin gertatzen den bezala.

ELAk ere aurpegiratu die erakunde publikoei gatazka honen aurrean duten jarrera. Hala, Arrasateko Udal Gobernuaren gehiengoak ez du langileek otsailaren 1ean aurkeztutako mozioa babestu, erakunde pribatu bati lotutako gaia dela argudiatuta. "Jarrera hori onartezina da herritarren osasunarekin lotutako gai bati buruz ari garenean".

ELAk herritarren babesa eskertu du eta gatazka hau konpontzeko beharrezkoak diren edukiak mahai gainean jartzeko eskatu dio enpresako zuzendaritzari.