Euskara eta elikadura burujabetza bultzatu Errigora babestuz

2020/11/05
Aurten ere ELAk bat egin nahi du Errigoraren Nafar hegoaldeko uzta euskarari puzka kanpainarekin. Ekimena azaroaren 12ra arte luzatuko da, eta aurten produktu bikainez osatutako hiru saski daude aukeran. Auzolanari esker, hauen balioaren %25 Nafarroa hegoalde eta erdialdean euskara bultzatzera bideratuko da.

Zertarako eskatu saskiak? Batetik, nola ez, dakartzaten produktuez gozatzeko. Bigarrenik, bertako ekoizpena sustatzeko. Eta, hirugarrenik, euskarari laguntzeko. Saskiak eskatuta, hauen balioaren %25 Nafarroa hegoaldeko eta erdialdeko euskalgintzari emango diozu. ELAk bat egiten du ekimen honekin, eta proiektua zabaldu nahi du.

Baina aurten, elkartasuna biderkatzea inoiz baino beharrezkoagoa da. Pandemiak eragindako nahas-mahasa dela eta, ikastolen jaialdiak eta Sortzenen jaia ezin izan dira egin eta Korrikarik ez dugu izango datorren udaberrian. Egoera honen aurrean saski bakoitzeko 5 euroko ekarpen gehigarria eskatuko dira, AEK-ri, Seaskari eta Sortzeni laguntzeko. Trukean, Korrikaren katilua, Seaskaren egutegia edo «D ereduaren haziak» eskuratuko dira.

Egin zure eskaria errigora.eus helbidean