ELAk manifestazioa egingo du Iruñean gutxieneko soldata propioa eta Erorien Monumentua eraisteko eskatzeko

ELAk "Gutxieneko soldata, hemen erabaki" lelopean ekingo dio aurtengo Maiatzaren Lehenari. Aldarrikapen honek argi eta garbi islatzen du sindikatuak euskal gehiengo sindikalarekin batera udaberri honetan egiten ari den kanpaina. Horrela laburbildu du Imanol Pascualek (ELAko Nafarroako koordinatzailea) Leire Gallego Batzorde Eragileko arduradunarekin batera gaur Iruñean eskainitako prentsaurrekoan.

Koordinatzaileak gogorarazi duenez, "negoziazio kolektiboko emaitzek eta prekarietatearen aurkako borrokak ELAren kontraboterearen ereduaren apustua berresten dute, eta Nafarroarentzat LGS propioa aldarrikatzea beste tresna bat da bide horretan, bokazio soberanista argia duena".

Duela hilabete batzuk iragarri zuen ELAk 1.795 eurotan ezartzen duela LGSa aberastasuna modu bidezkoagoan banatzeko. Milaka langile daude soldata kopuru horretatik urrun dutenak, bereziki sektore feminizatuetan eta arrazizatuetan, kasu askotan funtsezkoak direnak, pandemian frogatu zen bezala.

Hain zuzen ere, lehentasuna lan baldintza txarrenak dituzten pertsonen soldata hobetzea delako, ELAk lanbide arteko akordioa sinatzea proposatu die CEN, UGT eta CCOO erakundeei, Nafarroak lanbide arteko gutxieneko soldata propioa izan dezan. Hala ere, CEN, UGT eta CCOO bat etorri dira aukera hori baztertzeko, elkarrizketa sozialaren barruan negoziatu nahi duten gaia dela argudiatuta.

"ELAk ez du onartuko patronalak, UGTk eta CCOOk LGS propioa lortzeko aukera baztertzea – nabarmendu zuen Pascualek-. Horregatik, beste sindikatu batzuekin batera, sinadurak bilduko ditugu Nafarroako Parlamentuak LGS hemen erabakitzea eska dezan. Aukera argi baten aurrean gaude -gaineratu du ELAko koordinatzaileak-. Horregatik, garrantzitsua da inplikazio kolektiboa eta pertsonala sinadura bilketan herri ekimen legegilea izapidetzeko eta, horrela, gutxineko soldata propio baten alde presio egiteko: lorpen garrantzitsua litzateke Nafarroako langile klasearentzat ".

Leire Gallego: "Armetarako diru gehiago izateak murrizketa gehiago ekarriko ditu Osasunean eta Hezkuntzan"

Maiatzaren Lehenean, LGS propioa eskatzearekin batera, ELA irmo agertu da Europak sustatutako militarizazio-prozesuaren aurka, Leire Gallegok azaldu duen bezala: "Europako Batzordeak eta NATOk bultzatutako militarizazio estrategia mehatxu bat da bakerako, demokraziarako eta eskubide sozialetarako. Potentzia nagusiek euren enpresa handien interesak defendatzen dituzte, gerra mehatxua erabiliz baliabide natural, ekonomiko eta komertzialak kontrolatzeko ".

Ildo horretan, ELAk azpimarratu du gerra sistema kapitalistaren ondorio bat dela, eta horri aurre egin behar zaiola bakea eta herriekiko errespetua defendatzeko.

"EBk industria militarrera 800.000 milioi bideratzearen lehen ondorio negatiboetako bat politika sozialen murrizketa izango da. Funts publikoak armagintza industriara bideratu nahi dituzte, eta estrategia hori enpresa jakin batzuek eta Euskal Herriko botere ekonomikoak txalotu dute, gobernuen eta alderdi politiko askoren oniritziarekin".

Horregatik, ELAk berdintasunaren, justizia sozialaren, bakearen eta antimilitarismoaren balioak aldarrikatuko ditu Maiatzaren Lehenean, Palestinako herriari elkartasuna adieraziz eta Israelgo Estatuak egiten duen genozidioa salatuz.

Militarismoaren gorakadari ultraeskuinaren hazkundea gehitu behar zaio, eta "Euskal Herrian ere gizarteko zenbait sektoretan diskurtso arrazistak, matxistak edo LGTBIfobikoak zabaltzeko arriskua", adierazi du Gallegok.

Eskuin muturraren gorakadari aurre egiteko, ELAk ezinbestekotzat jotzen du urratsak ematen jarraitzea memoria demokratikoaren aitortzan eta frankismoaren milaka biktimen minaren konponketan, eta, horretarako, beharrezkoa da Erorien Monumentua eraistea. ELA Gerra Zibilean eta frankismoan errepresaliatutako erakundeen zerrendan dago, eta elkarte memorialistek PSNren, EH Bilduren eta Geroa Bairen akordioaren aurrean duten etsipen eta haserrearekin bat dator. Horregatik, aurtengo manifestazioa Erorien Monumentutik abiatuko da, Euskal Herrian dagoen mausoleo frankista handiena eraistea eskatzeko ekitaldia egiteko.

Horren aurrean, ELAk borroka soziala eta sindikala aldarrikatzen du, gizartea kolektiboki eraldatzeko konpromiso militantea. Etxebizitzak negozio izateari utz diezaion eta eskubide bihur dadin lortzeko, aberastasuna gehien dutenen interesen alde egin beharrean banatuko duen zerga sistema lortzeko, eta kalitatezko hezkuntza publikoa bermatzeko, greban dauden langileek eskatzen duten bezala. "Borroka horiek egiten dute Euskal Herri hobea", azpimarratu zuen Pascualek.

Horregatik, ELAk dei egiten du Maiatzaren Lehenean Iruñean egingo den manifestazioan parte hartzera.

Iruñean, 11:30etan Erorien monumentuan