Greba mugagabea Zumaiako San Juan erresidentzian, abenduaren 12tik aurrera

2022/11/29

Zumaiako (Gipuzkoa) San Juan erresidentziako langileek mobilizazioak gogortu dituzte eta greba mugagabea deitu dute abenduaren 12tik aurrera, hitzarmen propioa berritzeko. Langileek 262 greba egun bete dituzte hitzarmen sektorialaren alde borrokan; orain, enpresa hitzarmenaren alde borrokatuko dira. Guztira, 50 langile dira, gehienak emakumeak. Soldatak ez dira eguneratu 2016tik. Orduz geroztik, erosahalmena %11 murriztu da. Gainera, zentroak langileak murriztu ditu, baita garbikuntza eta mantentze lanetako orduak ere, kanpoko zerbitzuetan murrizketak ezarri ditu, eta elikagaien kalitatea murriztu du. Hori guztia Aldundiak beste alde batera begiratzen duen bitartean. Izan ere, Gipuzkoako Foru Aldundiko Kabia erakunde autonomoa da zentroaren titularra, baina langileek Zaintzen S.A. enpresa azpikontratatuarentzat egiten dute lan.

Zaintzen enpresak 2,7 milioi euroko irabaziak izan ditu 2019 eta 2021 artean. Bere akziodun nagusia Clece S.A. multinazionala da. Zaintza sektoreko enpresa honen helburua ahalik eta diru gehien irabaztea da, beti ere, finantzazio publikoari esker. “Hori lortzen da langileak esplotatuz eta egoiliarrei eskaintzen zaien zerbitzuaren kalitatea hondatuz”, kexu da ELA.

Sindikatuak birritan deitu dio enpresari Precoren bitartez negoziatzen hasteko, baina azken hori ez da agertu ere egin.

Langileek Aldundiari eta gainerako administrazioei dei egiten diete utz diezaiotela diru publikoarekin negozioa bultzatzeari. Horren ordez, genero arrakala gainditzeko eta pertsonak zentroan kokatzeko zaintza eredua ezartzea eskatuko diote. Horretarako ezinbestekotzat jotzen dute San Juan zahar egoitzan hitzarmen duina lortzea. Argi utzi dute mobilizazioek aurrera jarraituko dutela helburua lortu arte.