Kalitatezko zerbitzua lortzeko, gehiengo sindikalak mobilizazioekin jarraituko du

Azaroan egindako Lanbide Heziketako hiru greba egun arrakastatsuen ondoren, eta pasa den larunbatean, urtarrilaren 24an, Nafarroako Jauregiaren aurrean egindako kontzentrazioaren deialdiarekin batera, Hezkuntza Departamentuak urrats bat eman zuen Lanbide Heziketaren arazoei heltzeko Mahai Sektorial baten deialdia eginez. Egun horretan, Lanbide Heziketako ikasleen enpresetako egonaldien kudeaketa errazteko tutoreentzat 300 orduko eskaintza berri baten proposamena mahai gainean jarri zen.

Eskaintza horrek agerian utzi du Hezkuntza Departamentuaren ikasturte hasierako plangintza ez zela egokia izan eta baliabideak ez direla nahikoak. Egungo planteamenduarekin, irakasleak gainezka daude eta zailtasunak areagotu egin dira Lanbide Heziketa Dualaren aurreko planarekin alderatuta.

Aurreko ikasturtean ANPEk, AFAPNAk eta UGTk gutxiengoan sinatu zuten Itunean, Lanbide Heziketa bertatik kanpo utzi zuten, ikasle errepikatzaileak gutxiesten dituzte, eta ratioen ustezko jaitsiera hutsala irudikatu zuten, Lanbide Heziketan nabarmen urratzen dena. Hala ere, mobilizazioen bitartez irakasleek egindako presioari esker, Hezkuntza Departamentua eta Nafarroako Gobernuak LH Dualeko tutoretza lanetarako esleitutako orduak handitzera behartu ditugu, eskaintza ez nahikoa izaten jarraitzen duen arren, eta Lanbide Heziketa Duala arautzen duen Estatuko araudian eskatutako gutxienekoa betetzera mugatu.

Gehiengo sindikala ez dago hezkuntza publikoan egindako inbertsio igoeraren aurka. Neurri honek, ordea, ez ditu LH Dualaren kudeaketak eskatzen dituen beharrak asetzen, eta urrun gelditzen da plan zaharreko orduak parekatzeko aldarrikapenetik. Horregatik, presioa egiten jarraituko dugu Departamentuak negoziatzen jarrai dezan, eta hezkuntzan inbertsioa handitu dadin.