200 egun bete dituzte greban

La Morea merkataritza guneko H&Mko langileek (18 langile dira ELAko ordezkari batek ordezkatuta) gaur, ekainak 27, greba mugagabean 200 egun beteko dituzte. Hori dela eta, ekintza bat egin dute eta arropa oparitu dute Udaletxeko Plazan irudikatu duten azoka txiki batean “Si vendiendo no ganamos, mejor la regalamos. Lan baldintzak merkealdian” lelopean.

Langileek 2009tik soldatak izoztuta dituztela salatzen dute, KPIren eguneratzerik gabe eta erosahalmenaren ia % 25eko galerarekin. Aldarrikapen nagusiak, soldatak hobetzeaz gain, igandeetan eta jaiegunetan irekitzearen aurkako neurriak ezartzea, partzialtasuna murrizteko benetan lantzen diren lanaldiak finkatzea eta online salmentak lanposturik ez suntsitzea dira.

Greban zehar H&M-k %3ko soldata igoera baino ez du proposatu hitzarmenaren kontura (hau da, xurgatu egin daitekeena), soldata galeraren benetako zenbatekoa eta gainerako aldarrikapenak alde batera utzita. Denbora horren guztiaren ondoren, denda itxita eduki arren, enpresak oraindik ez du benetako elkarrizketarako aukerarik, eta, beraz, gatazka honi amaiera emango dion negoziaziorako ere ez. Gogoratu behar da langileek hilean 500 euro inguru irabazten dituzten bitartean, H&M-k 20 milioi euro banatu dituela dibidenduetan.

Horregatik, langileek grebarekin eta mobilizazioekin jarraituko dute enpresa hitzarmena negoziatzera behartzeko.