Burulan-Aernnovako langileek astebeteko greba hasi dute hitzarmenaren alde
Burulaneko Enpresa Batzordeak (6 ELA 3 USO) greba deitu du ekainaren 27ko astean, hitzarmena defendatzeko. Burulan 110 langileko enpresa da, Miñaon eta Kontzejuan kokatua, mekanizazioan aritzen da eta Aernnova Taldekoa da. Aurreko hitzarmenaren indarraldia 2021eko abenduaren 21ean amaitu zen. Orduz geroztik, enpresa batzordea langileen erosteko ahalmena berreskuratzeko negoziatzen ari da, pandemian zehar enpresak egin dituen abusuzko aldi baterako lan-erregulazioen ondoren. Zuzendaritza, hala ere, ez dago soldata-igoerarik emateko prest, ezta lan-eskubideetan aurrerapausorik emateko ere.
Enpresa Batzordeak irabazien araberako planteamendua egin zuen langileek sortutako aberastasuna banatzeko, soldata duina izateko, lanbide-sailkapen justua izateko, lanaldia murrizteko, txanda-kontratua egiteko eta enpresaren barruan hainbat alderdi hobetzeko.
Enpresak aldarrikapen horietako bat ere negoziatzeari uko egin zionez, langileek astebeteko greba egitea erabaki zuten, ekainaren 27an hasita.
Langileek eskatzen dute sortzen den aberastasuna enpresaren eta sektorearen errealitatera hobeto egokituta banatzea. Era berean, ildo beretik doan Arabako hitzarmen sektorialaren negoziazioa babesten dute.