Agerikoa da Bizkaiko Foru Aldundiko suhiltzaile zerbitzuan dagoen langile falta

2015/12/29
Azken egunetan Bizkaiko hainbat gunetan sortu diren suteek agerian utzi dute, beste behin, suhiltzaileen zerbitzuan dagoen langile falta. Udal eta foru administrazioko arduradun Ekaitz Oiangurenek salatzen duenez, “egun hauetan argi geratu dela suhiltzaile zerbitzuan dagoen langile falta. Herritarrei zerbitzu egokia eman ahal izateko langile gehiago behar dira. Izan ere, estrukturalak diren lanpostuak bete gabe daude, eta langileak ez dira ordezkatzen. Gainera, gehiagora doan behin-behinekotasuna ere salatu nahi dugu, gaur egun %30etik gorakoa baita behin-behinekotasuna”.

“Behin baino gehiagotan salatu dugu eremu ezberdinetan, eta oraingoan berriz ere exijitu nahi diogu Bizkaiko Foru Aldundiari lanpostu guztiak langile profesionalez eta egonkorrez betetzeko. Hurrengo enplegu publikorako eskaintzan bete gabeko lanpostu guztiak eskaini ditzala eskatzen dugu, behin-behinekotasun estrukturalarekin bukatzeko eta lanpostu eta langile hauek egonkortzeko. Instituzioek suhiltzaile zerbitzu publikoa bermatu behar dute bere osotasunean. Zerbitzu hau administrazioan guztiz barneratuta behar du, langile profesionalekin, denbora osoan eta lan baldintza duinetan lan egiten duten langileekin”, amaitzen du Oiangurenek.

Bukatzeko, ELAk suhiltzaile, basozain eta beste hainbat langilek egun hauetan suaren aurka Berangon, Sopelan eta beste hainbat herritan egin duten lana aldarrikatu nahi du. Profesionaltasun osoarekin egin dute lan, langileak faltan eta zerbitzuz kanpo egonda ere, herritarron segurtasunerako eta salbamendurako eskubidea bermatuz.