Astigarragako Cotronic enpresako langileek greba mugagabea hasi dute lan-baldintzak defendatzeko

2022/10/24
Astigarragako Cotronic enpresako 36 langileek greba mugagabea hasi dute gaur, enpresak ezarri nahi duen Lan Baldintzen Funtsezko Aldaketaren aurka. Aldaketa horrek lanaldian aldaketak eragingo lituzke, eta langile guztiek larunbatetan lan egin beharko lukete, dietak kobratzea galduko lukete eta lanaldi zatitua ezarriko lukete. Cotronic Movistarren azpikontratatutako enpresa bat da, eta telekomunikazio-sareak eraikitzeaz arduratzen da.

ELAk deitutako greba mugagabearen helburua langileen lan-baldintzak bermatzea da. Enpresak planteatutako Lan Baldintzen Funtsezko Aldaketak plantillaren % 100ari eragingo dio eta lanaldian aldaketak ekarriko ditu. Ondorioz, langile guztiak larunbatetan lan egitera behartuak egongo dira, dieten kobrantza galaraziko da eta lanaldi zatitua ezarriko da. Aldaketa horiek zuzenean eragiten diote familia-kontziliazioari.

ELAtik argi dugu bai Cotronic bai Movistar direla plantillaren prekarizazioaren errudunak, baita aldebakartasunez lan-baldintza batzuk inposatzearen errudunak ere, hau da, langileak beti enpresaren esanetara izatea eta langileen lan-eskubideak murriztea.

Aldaketa horren helburua da larunbatetan inolako ordainsaririk gabe lan egitea eta instalatzaileek, langile intineranteak izanik, eguneroko dietak poltsikotik ordaintzea.

Era berean, langileak jaiegunetan guardian egotera behartu nahi dituzte, baina, inolako lanik egiten ez badute, ez zaie inolako kopururik ordaintzen, ezta prestasuna nahi izanez gero ere. Hori dela eta, familia-kontziliazioa hondatzen du, baita jaiegunetan ere.