Autobusen egoera eskasak arriskuan jartzen ditu langile eta bidaiariak

PESA enpresarena da Avanza Gipuzkoa autobus emakiduna eta lurraldeko hainbat linearen ardura dauka. Erabiltzen dituzten autobus asko, baina, egoera eskasean daude, ELA sindikatuak behin baino gehiagotan salatu duen bezala. Enpresak, halere, ez ditu gauzak hobetu.

Lurrun kontrolik gabe, gidariaren aurreko beira lausotu egiten da askotan, gidatzea arriskutsua eginez. Maletategiak indargabetuta dituzte autobus askok ere bai, eta bidaiariak errepidera ateratzera behartuta daude ekipajea hartzeko. Gurpilak eta hagunak zaharkituta dituzte autobus askok eta ateak ez dira ondo ixten. Klimatizazio sistema maiz ez dabil ondo eta azkoin asko askatzeko zorian daude. Komunikazio sistemarik gabe, gainera, matxuren eta gorabeheren berri emateko modurik ez daukate.

Egoerak jasanezina izaten jarraitzen du eta zoritxar bat gerta daiteke. Horregatik, ELAk uste du beharrezkoa dela Gipuzkoako Foru Aldundiak eta Lan Ikuskaritzak ahalik eta azkarren esku hartzea, arduradun nagusiak beraiek direlako.