Lan-istripu hilgarri berria Basogintza sektorean
Ez dakigu zer prebentzio-neurri hartu zituzten edo lan-prozedura seguruak zituzten enpresa honen kasuan, baina, oro har, basogintzaren eta zuraren sektoreko prebentzioa ez da jardueraren beraren arriskuen mailan egoten. Makina astunak eta arriskutsuak erabiltzen dira, arrisku handiko eremuetan lan egin behar da, besteak beste, lurraren inklinazioagatik edo klimagatik eta istripuak izateko arrisku handia dute . Askotan, erabilitako ekipoak ez dira behar bezala mantentzen, ez dago zeregin konplexu eta arriskutsuak egiteko behar adina langilerik, edo langileei ez zaie prestakuntza egokia ematen, eta horrek lan-istripu bat izateko arriskua larriagotzen du. Arrisku handiko sektorea izanik, errekurtso prebentibo baten beharra izaten da normalean , baina gehienetan ez da egoten prebentzio figura hau neurri prebentiboak bermatzeko.
Kontuan hartuta HEHn basogintza-sektorea pisuzko jarduera dela eta urtero pertsona asko hiltzen direla jarduera horretan, administrazioak eta Lan Ikuskaritzak baliabide gehiago lehenetsi eta bideratu beharko lituzkete enpresa horietan prebentzio- eta segurtasun-mailak kontrolatzeko. Erakundeek basogintzako sektorean ezbehar-tasa murrizteko jardunaldiak eta kanpainak ematen dituzte, baina gero, praktikan, ez dira enpresak kontrolatzen prebentzioaren arloan, salatzen ari garena bezalako ezbeharrak gertatu arte.
ELAk erabateko babesa eta elkartasuna adierazi nahi die hildakoaren senide eta lankideei, eta, aldi berean, gertatutakoa berehala ikertzeko eskatzen du, istripuaren arrazoiak argitzeko eta erantzukizunak argitzeko.
Erakundeek prebentzio-neurri handiagoak eta egokiagoak eskatu behar dituzte lan horiek egiteko, eta horien jarraipena egin behar dute, langileentzako modu egoki eta seguruan egiten direla bermatzeko.
Azkenik, ELAk berretsi egin du langileok pairatzen dugun ezbehar-tasa handiaren jatorrian mantentzen den lan-prekarietatea erabat desagerrarazteko borrokan jarraitzeko konpromisoa. Horretarako, ELAk gehiengo sindikalarekin batera, urriaren 7an barikuan, goizeko 11etan, Gernikako San Kristobal enparantzan deitutako elkarretaratzean parte hartzera gonbidatzen ditugu pertsona guztiak, lan-istripu berri hau salatzeko.