Bi greba egun gehiago deitu dituzte hitzarmenaren negoziazioan aurrera egiteko

ASPACE BIZKAIAk garun paralisia duten pertsonei arreta eskaintzen die, Bizkaiko Foru Aldundiarekin sinatutako lankidetza hitzarmenen bidez. 2019an amaitu zen hitzarmenaren negoziazioan aurrera egiteko 11 negoziazio bilera eta 5 greba egun egin ondoren, lan-hitzarmenak berritu gabe jarraitzen du.

Uztailean izandako bilerek akordioa lortzeko balio izan ez zutenez, enpresa batzordeak beste bi greba egun deitu ditu irailaren 28rako eta urriaren 5erako, eta batzarrean berretsi dira.

ASPACE Bizkaiko enpresako langileak kalera aterako dira berriro, KPIaren gaineko soldata igoerak bermatuko dituen eta galdutako erosahalmena ( % 21ekoa) berreskuratuko duen hitzarmen bat defendatzeko.

Langileek argi dute mobilizazioa funtsezkoa dela euren lan baldintzak defendatzeko, eta, beraz, aurrerapausorik eman ezean, greba egunak areagotuko dira. Enpresa batzordeak Amaia Antxustegi Gizarte Ekintza Saileko diputatuari ere gatazkaren konponbidean inplikatzeko eskatzen dio.