Deustuko Etengabeko Arreta-gunearen alde elkarretaratzea

2020/12/18
Osasun-langileak eta herritarrak oro har bildu dira Deustuko anbulatorioaren aurrean (Bilbo), NPBren itxiera presentziala salatzeko eta azkenean ez egiteko eskatzeko. Osakidetzak erabaki du zerbitzu horrek gauetan, 00: 00etatik 08: 00etara, lan egiteari uztea. Bizkaiko Lehen Mailako Arretako Batzordeak – ELA, SATSE, SME, LAB, CCOO, UGT eta ESK sindikatuek osatua – Manifestazioa deitu du, herritar guztiei eskaintzen ez zaien osasun-zerbitzu baten murrizketaren aurrean gaudelako, eta, gainera, ondorio larriak izango dituelako pazienteentzat eta osasun-sistema publikoarentzat.

Azpimarratu behar da Osakidetzak berak honela definitu dituela Etengabeko Arreta Guneak (PAC): "Hil ala bizikoak ez diren gainerako premiazko arretak behar izanez gero, jo beharreko lehen zerbitzua da".

Hala, neurri horrek, praktikan, Lehen Arreta are gehiago kargatzea dakar; baina, batez ere, Basurtuko Ospitaleko larrialdiak gainez egitea dakar, Izan ere, larrialdi-zerbitzu horiek, dagoeneko, arreta-presio handia izaten dute. Eta oraingo lan-karga gutxi balitz bezala, hemendik aurrera ospitaleko larrialdiei ez dagozkien patologien eta kasuen arreta leporatu nahi diote. Hala da, patologia eta kasu arinak orain arte PACetan artatu izan dira, Osakidetzak berak ondo definiturik daukan bezala. Hori dela-eta, larrialdirik larrienak artatzea zailagoa izango da aurrerantzean, eta aldi berean Basurtuko larrialdietara doazen pazienteen itxaronaldiak luzeagoak izango dira. Pandemia-garai honetan, gainera, neurri horrek kutsatze-arriskua areagotuko da, bai pazienteen artean, bai haien senide eta lagunen artean, eta baita ospitaleko langileen artean ere.

Azken urteotan Lehen Arreta gero eta beteago egon da, eta pazienteek, beren osasun-zentroan arreta hartzeko, zenbait egunetan itxaron behar izaten dute; baina PACak dira herritarrek gehien erabiltzen dituzten zentroak, printzipioz horren larriak ez diren gaitzak lehenbailehen tratatzeko. Oraingo pandemia-garaian, gainera, inoiz baino beharrezkoagoak dira, telefono bidezko arreta baino ez dagoelako.

Iragarritako ekimen hori Osakidetzak PACen zerbitzua murrizteko edo desagerrarazteko duen estrategiaren baitan dago. Gogora dezagun duela gutxi Gorlizko PACa itxi nahi izan zutela, eta herriko mobilizazioari esker itxiera bertan behera gelditu zela. Beste adibide bat Zumarragako PACen dugu, non arreta-ordutegia laburtu den. Eta beste horrenbeste gertatzen da Bergaran eta Elgoibarren.

Pandemia honek zerbait erakutsi badigu, osasun-sistema publiko, sendo eta kalitatezko bat izateko beharra dagoela da. Hala ere, Eusko Jaurlaritzaren politikak kontrako bidetik doaz, osasun publikoa gero eta gehiago argaltzearen bidetik.