Donostiako ospitalean 967 behin behineko lanpostu suntsitu direla salatu du ELAk

2013/02/15
ELAk aztertu du Donostiako Unibertsitate Ospitalean azken 3 urteotan egin den behin-behineko kontratazioa. 2010. urtean 211.730 lan-egun egiteko beste pertsonala kontratatu zen, eta 2011n kopurua 349.967 lan-egun izatera igo zen. Hala ere, 2012an kontratazioko 60.906 lan-egunera jaitsi zen, Osakidetzak langileen bajak, lizentziak eta oporrak ez ordezteko hartu zuen erabakia zela-eta.

Behin-behineko kontratazioko egun horiek lanaldi osoko kontrataziora aldatzen baditugu, esan dezakegu Donostiako Unibertsitate Ospitalean 2012. urtean, aurreko bi urteetako batez bestekoaren aldean, 967 lanposturen parekoa suntsitu dela.

Izatez ospitalean badago behin-behineko langile asko, azken urteetan urterik gehiena lan egin dutenak, eta gaur egun langabezian daudenak. Egoera hori larriagotuko da Eusko Jaurlaritzak 37½ko aste-lanaldia ezartzen badu, eta aukerako egunak kentzen baditu; izan ere, horren ondorio zuzena gutxienez 250 lanpostu gehiago suntsitzea izango zen ospitale honetan, Gipuzkoako enpresarik handienean, 5.138 langile baititu.

ELAk bestalde azpimarratzen du, 2012ko enplegu-galera hori ez ezik, Osakidetzako langileek, Eusko Jaurlaritzako gainerako herri-langileek bezala, eroste-ahalmenaren %20 galdu dutela azken bi urte eta erdian.

Beraz, batetik, enplegu-suntsipena eta, bestetik, eroste-ahalmenaren galera eta Donostiako Ospitaleko langileen lan-baldintzetan egindako bestelako murrizketak eragiteko moduko arrazoiak dira herritarrei ematen zaien zerbitzuaren kalitatean antzemateko, eta hala salatu du ELAk.

Horregatik, ELAk eskatzen die Osakidetzako arduradunei enplegu publikoaren aldeko apustua egiteko, 35 orduko lanaldiari eusteko, eta langileek galdutako eroste-ahalmena berreskuratzeko; ez baikara krisitik azkarrago aterako zerbitzu publikoak narriatzen edo enplegu publikoa suntsitzen, alderantziz baizik.

Hori dela-eta, ELAk bultzatzen ditu Donostiako Ospitaleko langileak mobilizazioetara, eta dei egiten die gipuzkoar guztiei kalitatezko osasun-zerbitzu publikoa, edonorentzat eskuragarri, eska diezaieten politikariei.