Eaton ixteko baldintzei buruzko akordioa, 62 eguneko grebaren ostean
Sindikatuak modu gazi-gozoan baloratzen du akordioa. Alde positiboa izan da zerbitzu juridiko-teknikoen baterako lana, erresistentzia-kutxa eta, beste ezeren gainetik, langileen antolaketa eta borroka eredugarria, multinazionalaren ibilbide-orria geldiarazi baitute. Ezezkoa, ezin izan dutela itxiera saihestu. Hasieratik, Eatongo langileek borroka egin behar izan dute enplegua suntsitzeko bidea errazten dien lan-erreforma bat duen multinazional baten aurka, etekinei eusteko. "Kolektibo horren borroka handia eredugarria izan behar da politika neoliberalek erasotzen dieten beste enpresa askorentzat", nabarmendu du sindikatuak.
Azkenik, ELAk salatu du euskal erakundeek Eatongo langileak bertan behera utzi dituztela. "Gu industria-politikaz hitz egiten saiatzen ginen bitartean, erakundeek bizkarra ematen zieten langileei. Horrela ez da ez industria ez enplegua defendatzen; horrela ez da herrialdea eraikitzen ", azpimarratu du sindikatuak.