Egin Dezagun Bideak plataformaren deialdiarekin bat egin du ELAk
ELAk sarri esan izan du espetxe-politika ezin dela xantaia eta presio politiko arma gisa erabili. Horregatik eskatzen dio Espainiako gobernuari politika hori askatasunik gabe dauden pertsonen eskubideekiko errespetu zorrotzean oinarrituta egin dezala. Zehatzago, sindikatu honek eskatzen du oraintxe bertan amai dadila presoen sakabanatzea, bakartze kasuak eta zigorren luzapena. Halaber, ELAk exijitzen du gaixorik dauden presoak eta beren zigorraren hiru laurden bete dutenak kaleratzea.
ELAren ustez honelako erabakiek, gainera, gure herrian bakezko egoera finkatu eta demokratizatze handiagoa sendotzeko lagungarri izan daitezke. Horixe da, hain zuzen, gizartearen gehiengoak eskatzen duena, adibidez Bilbon joan den urtarrilaren 8an izan zen manifestazioan agerian geratu zen legez.