ELA ez da joango Confebask-en bilerara
ELA ez da joango Confebask-en bilerara, hurrengo arrazoi hauek direla-eta:
-
Confebask-ek onargarritasuna eman nahi dio langileriarentzat oso kaltegarri den negoziazio-eredu bati. Abiapuntuak dira lan-erreforma osotasunean onartzea eta enpresei malgutasun handiagoa ematea.
-
ELAk gogoratzen du patronaleko ordezkariek (Garamendi Confebask-en hautagaia zen CEOEko lehendakaritzarako) azpimarratu dutela akordio hori ez dela loteslea, eta soldata-igoerari dagokionez "minus infinitutik %1eraino ezarri daitekeela". CEOEk, bere aldetik, zirkular bana bidali die elkargokideei sinaturikoa nola interpretatu behar den azalduz, eta besteak beste, derrigorrez bete beharreko ezer ez dagoela dio.
-
Patronalak, akordioa loteslea ez dela esateaz gain, beste lan-erreforma bat eskatzen dio PPri, besteak beste, kaleratze askea eta askoz merkeagoa ezartzeko, eta epaileek aurrerantzean lehengo erreformaren ondoriorik gogorrenak arintzeko aukerarik ez izateko.
-
Patronalak darabiltzan estrategiak (zerbitzuak kanpora ateratzea, azpikontratatzea, lanaldi partzialeko kontratazioaz gehiegi baliatzea, lege-iruzurrean egindako behin-behineko kontratazioa, outsourcing...) lan-esplotazioa areagotzekoak dira, eta akordio horrek ez die mugarik jarriko.
-
ELAk gogoratzen du, gainera, Confebask-ek ez duela eskumenik hitzarmenak egiteko, eta hala errepikatzen diote lurraldeetako elkargokideek (CEBEK, SEA eta ADEGI). Lurralde-elkargo horiek dira, hain zuzen, negoziazio kolektiboa blokeaturik dutenak.
ELAk ez die akordio-sinatzaileei publizitaterik egingo akordioa 17 autonomia-erkidegoetan klonatzeko. ELAren ustez patronalen estrategiei aurre egiteko modu bakarra langileak antolatzea da. Lan-baldintza duinak ez dira zainduko, ezta hobetuko ere, horrelako akordioen bidez edo patronalak deitu duen bilera bezalakoen bidez.