ELA, SATSE, LAB, SME, CCOO, UGT ez dira joango Mahai Sektorialaren hurrengo bilerara Osakidetzak uko egin diolako eskatutako gaiak gai ordenean sartu eta negoziatzea
Biharko Mahai Sektorialaren bilerari dagokionez, Osakidetzak gai zerrendan sartu nahi zituzten gaien zerrenda eskatu zien sindikatuei. Sindikatuek beren aldarrikapenak behin eta berriz iragarri dituzten arren, negoziazioaren abiapuntu gisa honako gai hauek proposatu dituzte:
- Mahai sektorialaren erabakiak betetzea
- 4ko parekatzea. Txandakako lanaren osagarria
- Lehen mailako arreta. Ordutegiak berreskuratzea eta IUPak berriro irekitzea
- Gainerako gaien negoziazioaren egutegia
Mahai Sektorialaren gai zerrenda jaso ondoren, sindikatuek berriro ikusi dute Osakidetzak ez duela eskatutako puntuetako bat ere sartu, bilera horretan aztertu beharreko gaiak ez direla argudiatuta. Horregatik, SATSE, ELA, LAB, SME, CCOO eta UGTk, ESKren babesarekin, uko egin diote informazio mahai huts batera joateari.
Onartezina da hainbat greba eta mobilizazioren ondoren Osakidetzak, alde bakarrez, gai horiek amaitutzat ematea. Argi dago sindikatuek gaiak gai zerrendan sartzea eskatzen dutenean, helburua gai horiek negoziatzea dela.
Hori gertatzen da Lehen Mailako Arretako Zentroetako ordutegiaren aldaketarekin; izan ere, horrek eragina du langileen lan ordutegian, eta, are gehiago, lekualdaketa badakar berekin. Horri gehitu behar zaio udara iristen ari garela, eta, beraz, urte bakoitzeko langile faltaren arazoak errepikatuko direla. Herritarrei arreta emateko guneak murriztuko dira eta osasun-langileen oporrak bertan behera utziko dira, eta horrek, beste behin ere, eragin negatiboa izango du eskaintzen den zerbitzuan. Beste uda batez, lan eskubideen murrizketa, langileentzako lan gainkarga eta herritarrei eskaintzen zaien zerbitzuaren murrizketa aplikatuko dira.
Sindikatuek elkarrizketaren eta negoziazioaren aldeko apustua egiten dute, langileek merezi dutelako, errespetuagatik eta oinarrizko eskubideak bermatzeagatik, baina Osakidetza negoziatzeko prest ez dagoen bitartean, mobilizazioekin jarraituko da eta langileen benetako arazoei aurre egiten ez dieten mahai sektorialetara ez da joko.