ELAk arbuiatu du balizko iruzurren aurka salaketa anonimoak egiteko postontzia

Lanbidek «Betetzea zure bermea da» kanpaina iragarri zuen atzo, azaroak 18. Kanpaina horretan, «iruzurraren aurkako postontzi» bat jartzeko ekimena aurkeztu zuen. Horren helburua da era anonimoan Diru Sarrerak Bermatzeko Errentaren (DSBE) eta Bizitzeko Gutxieneko Diru-sarreraren ustezko iruzurra salatzea, era anonimoan. ELAk erabat arbuiatu du neurri hori, eta, gainera, oso larritzat jo du.

ELAren arabera, gizarte prestazioak jasotzen dituztenak kriminalizatzen eta estigmatizatzen dira horrelako neurriak hartuta. DSBEari buruzko legearen azken erreformak Lanbideko langileen artean ikuskatzaileen figura sortzea aurreikusten zuen, eta prestazioak jasotzen dituztenen etxean sartzeko ahalmena ere badu. Neurri hura salatu zuen ELAk, baina azken erabakiak herritarrak tartean sartzen ditu. “Auzotarren artean iruzurraren irudia transmititzen da, eta salatzera animatzen dute herritarrak, euren erantzukizuna delakoan”, kexu da sindikatua. Lanbidek argudiatzen du herritarrek dagoeneko salatzen zutela, eta salaketa horietan ordena jartzea dela neurriaren helburua.

Lanbideren arabera, postontzia sortzeak etikaren eta baliabide publikoen babesaren aldeko konpromisoa islatzen du, benetan behar dutenek gizarte funtsak behar bezala erabil ditzaten. “Hau da, beste behin ere, nahita adierazten da batzuek ongia egiten dutela eta beste batzuek (kasualitatez, premia handiena dutenek) gaizkia, eta prestazioa jasotzen dutenen arteko iruzurra handia denaren mezua zabaltzen da, datuek guztiz kontrakoa erakusten dutenean”, dio ELAk.

Era berean, adierazi dute beste herrialde batzuetan antzeko martxan jarri direla. ELAk uste du Jaurlaritza eta Lanbide gehiago arduratu beharko liratekeela beste herrialde batzuen antza hartzeaz pobrezia arintzeko prestazio sozial eta politikoen arloko estaldura mailari dagokionez. Gainera, dio, iruzur fiskalari aurre egin beharko liokete, “ikusten ari baita ez dutela inolako interesik hura jazartzeko, diru gehien irabazten dutenekin, iruzur gehien egiten dutenekin eta enpresekin bat egiteagatik, ziurrenik”.

ELAk gizarte prestazioak jasotzen dituztenen aurkako neurri kriminalizatzaile oro errefusatzen eta salatzen jarraituko du.