ELAk errefusatu ditu Vayven Deliveryren kaleratzeak eta Amazoni plantillaren subrogazioa eskatu dio

Vayven Delivery enpresak, Amazon-Trapagarango azpikontratak, prozedura bat hasi du plantillako lan-kontratu guztiak amaitzeko. Enpresak mezularitzako eta paketeria txikiko zerbitzuak ematen ditu, azpikontratatuta eta Amazon multinazionalarentzat bakarrik.
Kaleratze kolektiboaren prozeduraren arrazoia Amazonek Vayvenen zerbitzuak alde batera uzteko hartutako erabakia da. ELAk bete-betean errefusatu du enpresak planteatutako EEEa, eta Amazoni plantillaren subrogazioa eskatu dio.
ELAk salatu du gertaera hori Amazonek sortzen duen enpleguaren etengabeko prekarizazio-politikaren barruan dagoela, bai plantillan bertan, bai azpikontratazio-katean, irregulartasunez eta legez kanpokotasunez josita.
Vayven Deliveryko langileek epai bat irabazi zuten Bizkaiko salgaien garraioaren hitzarmena aplikatzeagatik. Amazonek, kostuak izugarri merkatzeagatik, Vayven behartu zuen epaia ez betetzera, kontratua hausteko mehatxua eginez. Eta Vayvenek xantaiari amore eman zion arren, Amazonek amaitutzat eman du azpikontratarekin zuen kontratua. Bertan, 23 pertsonak egiten dute lan esklusiboki multinazionalaren artikuluak banatzeko.
Kontratak aldatzeko hipotesiaren aurrean plantillak subrogatzeko eskakizuna sektorean ezarri behar da oro har, eta Amazonen bereziki.
ELAk Vayven Deliveryn enpleguarekin jarraitzearen alde borrokatuko du, bai bide sindikaletik mobilizazioak planteatuz, bai bide juridikotik, Amazoni plantillaren subrogazioa exijituz.