ELAk eskumena hartzearen alde egiten du, baina Guardia Civila Foruzaingoan sartu gabe

Foru Gobernuak atzo iragarri zuen uztailaren 1etik aurrera Nafarroak bere gain hartuko duela trafikoaren kudeaketa esklusiboa. ELA Nafarroak trafiko-eskumena bere gain hartzearen alde dago. Horregatik, iragarritakoa, aurrekoetan gertatu ez den bezala, oraingo honetan egia bihurtzea espero du.

Zentzu horretan, nahiz eta Foru Hobekuntzak aitortzen duen trafiko eskumenak Nafarroari dagozkiola, Estatuak frankismo garaian usurpatu egin zuen, eta gero mantendu ditu, Nafarroari inoiz erabat laga gabe. Zoritxarrez, transferentzia hori ez da Nafarroaren eta Estatuaren arteko aldebikotasun-harreman baten ondorio; aitzitik, Auzitegi Gorenak (2018ko martxoan) ezarri zuen Nafarroari dagokiola eskumen horiek gauzatzea.

ELA beti agertu da Nafarroak eskumen hori bere gain hartzearen alde, eta, horretarako, prozesu hori Foruzaingoaren plantilla handituz egitea defendatu du, eta ez Guardia Zibila Foruzaingoan pasarelaren bidez integratuz. Hala ere, UPNk, Geroa Baik, EH Bilduk eta Podemosen zati batek onartutako 2018ko Polizien Legeak eta PSNk, Geroa Baik, Ahal Duguk, EH Bilduk eta Izquierda-Ezkerrak onartutako 2023ko Nafarroako Aurrekontuek (Bosgarren Xedapen Gehigarria), Guardia Zibilaren agenteak Foruzaingoan integratzea aurreikusten dute.

Foruzaingoak trafikoaren eskumena bere gain hartzea Foruzaingoaren garapen integralerako lehen urratsa izan behar da, eta horrek ere polizia-ereduari buruzko eztabaida bati ekin behar dio. Ildo horretan, ELAk Foruzaingo profesional baten alde egiten du, izaera zibilekoa, genero-ikuspegia duena eta herritarren hizkuntza-eskubideak errespetatzen dituena.