ELAk eta LABek gehiengo demokratikoen errespetua exijituko dute Lehendakaritzaren aurrean

2016/09/12
ELA eta LAB sindikatuek manifestazioa deitu dute irailaren 20rako Gasteizen (10:30, Correos Plaza). Bertan sindikatu hauek uztailaren 22an Gizarte Elkarrizketaren Mahaia delakoan Eusko Jaurlaritzak, Confebask patronalak eta CCOO eta UGT sindikatuek negoziazio kolektiboaren inguruan adostutako ituna salatuko dute. Manifestazioa Lehendakaritzaren egoitzaren aurrean amaituko da; bertan langileek hautetsontzietan aukeratutako gehiengoak errespetatu daitezela exijituko da.

Gaur goizean ELA eta LABeko ordezkariek agerraldi publikoa egin dute mobilizazio hau aurkezteko. ELAko idazkari nagusi Adolfo Muñozek azpimarratu duenez, “Eusko Jaurlaritzak, Confebaskek, CCOOk eta UGTk lortutako akordioak gehiengo demokratikoak hausten ditu. Patronalari mesede egiten dion eskrupulurik gabeko erasoa da. Erabaki honetan Eusko Jaurlaritza eta patronala eskutik doaz. Bat datoz euren interesetan: soldaten jaitsiera eta lan prekarietatea handitzea bilatzen dute. Badira Eusko Jaurlaritzan patronalaren ordezkariak balira hitz egiten duten lagunak”.

“ELAk –gaineratu du– ez dio patronalari bake soziala bermatuko. Gure helburua Euskal Herriko langile klasearen lan baldintzak hobetzearen alde borrokatzea da. Horretarako langileen gehiengo zabal baten babesa dugu. Hauteskundez hauteskunde irailaren 20ko manifestazioa deitzen dugun sindikatuok lortzen dugun babesa horren lekuko da”.