ELAk eutsi egingo dio grebari Bizkaiko kirol-lokal eta -zelaien sektorean

Gainera, langile gehienak udal kiroldegitean ari dira beharrean; hots, administrazioak azpikontratatutako beharginak dira, eta ondorioz, ardura politikoa argia da kolektibo honen prekaritatearekiko: finantziazio publikoak eragiten du lan baldintzetan, enpresak bitartekari hutsak baitira. Esaterako, Bilboko Udalak kolektibo honen zati handi bat baldintza prekarioetan dauka azpikontratatuta. ELAk alderdi politikoei dei egiten die lan-baldintza eta soldata duinak berma ditzaten.
ELAren iritziz atzo CEBEKek zabaldu zuen oharra onartezina da; patronalak negoziazioa itxi nahi du eta har ditzakeen neurriez ohartarazi du. Greba egoera bat, non alderdiak negoziatzera behartuta dauden, ez da zubiak lehertzeko une egokia. Enpresak gonbidatzen ditugu euren jarrera alda dezaten eta saia daitezen sektorerako eragin orokorreko lan-hitzarmen bat egiten, zeinak enpresa guztiak derrigortuko dituen eta enpresa piratei sarrera galaraziko dien.
ELAk, sektorean gehiengo absolutua duelarik (54%), sindikatu bakarra izanik eragin orokorreko hitzarmena sinatzeko ahalmenarekin, arbuiatu egin du enpresek erreferendum bat sustatzea sektoreko gutxiengoa ordezkatzen duten sindikatuen bidez. Kontsulta horren helburu bakarra da greba eta mobilizazioa indargabetzea; alabaina, plantillak mobilizatzea erabaki du, areago kontutan izanik euskal gehiengo sindikalarentzat 1.200 euroko gutxieneko soldata funtsezko eskaria dela.
ELA harremanetan jarriko da alderdi politikoekin udaletan -hasteko, Bilbon- mozioak aurkez ditzaten, kirol kudeaketaren azpikontratetan prekaritatea desagerrarazteko.