ELAk garraiolari baten heriotza salatu du eta lan ezbeharren aurkako neurri gehiago eskatu dizkio Nafarroako Gobernuari

Atzo Cerio Ensilados enpresako langile bat hil zen bere kamioiak Ejea de los Caballerosen (Zaragoza) istripua izan zuenean. ELAk laneko heriotza eta prebentzioan inbertsiorik ez egiteagatik transportistek jasaten duten prekarietatea salatu du.

Azken heriotza honekin, 10 dira Nafarroan 2024an hildako langileak. Nafarroan, istripu hilgarrien eta larrien erdiak segurtasun neurri ezagatik gertatzen dira, eta lan ikuskaritza kolapsatuta dago langilerik ez dagoelako. ELAk Lan Ikuskaritzako plantilla hirukoiztea eskatzen du, Europako jarraibideak betetzeko eta Nafarroako enpresetan eta lantokietan sistematikoki ematen diren ez betetzeak behar bezala kontrolatzeko.

Urtetik urtera, gero eta garraiolari gehiago hiltzen dira lan istripuz dituzten lan baldintza eskasen ondorioz. Garraiolari asko autonomoak dira, eta horrek ere ez du laguntzen gutxieneko segurtasun neurriak bermatzen. Askotan, lanaldi amaigabeak egin behar izaten dituzte soldata duina lortzeko, atsedenaldiak errespetatu gabe. Bide sarearen egoera txarrak eta ibilgailuen mantentze lanik ezak egoera okertzen du eta lan istripuak izateko probabilitatea handitzen du. Gainera, adierazi behar da asko trafiko istripu gisa kamuflatzen direla lan istripuak direnean, prekarietateak sektore honetako istripuekin zerikusirik ez balu bezala.