ELAk greba deitu du Nafarroako Gobernuari presioa egiteko

Sindikatuak mobilizazioekin eta grebekin duen konpromisoa berretsi du. Otsailaren 15ean Administrazio osoan greba deitu zuen sindikatuetako bat izan zen ELA. Era berean, sindikatuak grebara deitu zituen Hezkuntzako langileak apirilaren 3an eta Osasunbideko langileak apirilaren 4an. ELAk argi du greba-egun gehiagoren bidez bakarrik egingo dela Nafarroako Gobernuak aldarrikapenei erantzuteko adinako presioa.

Otsailean langile publiko guztiak grebara eraman zituzten arrazoi berberek indarrean jarraitzen dute gaur egun Justizian; erosteko ahalmenaren galerak edo behin-behinekotasun-tasa altuek zeuden bezala jarraitzen dute. Horregatik, garrantzitsua da sektore guztietako mobilizazioekin jarraitzea.
ELAren ustez, lanuzteen eta greben testuinguru honetako agente negoziatzailea Nafarroako Gobernua izan behar da. Hor egin behar dugu presioa aurrekontuetan gastu publikoa handitu dadin. Azken hilabete hauetan ikusi ahal izan dugu Foru Gobernuak eskumenak dituela hobekuntzei ekiteko, eta orain unea da hobekuntza horiek Administrazio osoari aplikatzeko eskatzeko.

Horregatik, sindikatuak presioa egin nahi du Nafarroan, negoziazioei ekin ahal izateko. Justiziako Langileen Batzordearen gehiengoak estatuko negoziazioan jartzen du arreta eta Nafarroako egoera ikusezin bihurtzen du; ELAk, ordea, presioa hemen egin behar dela uste du. Nafarroak badu autogobernurako gaitasuna, bai eta hemen sortzen diren lan-gatazkei aurre egiteko legitimazioa duten organoak ere – kasu honetan, Justiziako Mahai Sektoriala eta Mahai Orokorra –.
Sindikatuak datozen greba egunetan parte hartuko du eta Nafarroako Gobernua zuzenean interpelatuko du. Halaber, mobilizazioetara, lanuzteetara eta grebetara deitzen jarraituko du Nafarroan ELAk, Administrazio osoko lan-baldintzak hobetzea lortu arte.