ELAk hitzarmena inpugnatu du, gutxienez 6 artikulu ezin direlako gutxiengoan sinaturiko akordioan sartu

ELAk Arabako Etxez Etxeko Laguntza hitzarmenaren inpugnazioa erregistratu du, gutxiengoan sinatutako hitzarmenetan sartu ezin diren gutxienez sei artikulu dituelako, "orokortasun-proiekzioa" duten baldintzak arautzeagatik.
ELAk inpugnatutako artikuluak honako hauek dira:
• 14. artikulua.- Prebentzioa eta lan-osasuna.
• 17. artikulua.- Lanbide-heziketa.
• 21. artikulua.- Hutsegiteak eta zehapenak.
• 22. artikulua.- Berme sindikalak
• 24. artikulua.- Sektorearen egonkortasuna.
• 26. artikulua.- Soldata-erregimena ez aplikatzeko baldintzak eta prozedura.

ELAk % 46ko ordezkaritza du Arabako etxez etxeko laguntza-zerbitzuan, eta hasieratik erabat errefusatu du CCOOk eta patronalak lortutako hitzarmen antidemokratikoa sinatzea. Akordio hori patronalaren xantaiatik sortu zen, eta langileen ordezkari batzuk erabaki zuten adostutako plataforma ez betetzea eta sektorearen aldarrikapenak alde batera uztea.

Akordio horrek Arabako ELZko langileen lan-baldintzak nabarmen murriztea ekarri du. Azken urteetako inflazioa kontuan hartuta, akordioak sektorearen pobretze handia ekarriko du. Gainera, CCOOk bertan behera utzi zituen plantillen erreklamazio ugari: soldata-bermea handitzea, ABE osagarriak nabarmen hobetzea, lizentziak eta baimenak hobetzea... besteak beste.

ELAk sinaduraren egunean adierazi zuen akordioaren aurka egingo zuela, demokraziaren aurkakoa zelako. Inpugnazio hori da horren adibide. ELAk borrokan jarraituko du Arabako ELZk merezi dituen lan- eta bizi-baldintzak izan ditzan.