ELAk kanpaina bati ekin dio arrazismoaren eta diskriminazioaren aurka Nafarroako 350 atal sindikal baino gehiago aktibatzeko

ELAk prentsaurrekoan aurkeztu du ‘Guztion prekaritatea borrokatu. Hacia un sindicalismo antirracista’ kanpaina, eta datozen hiletan arrazismoaren eta diskriminazioaren aurkako borroka ehunka lantokitara eramango du. ELAk milaka militante aktibatu nahi ditu eginkizun horretan. Beraz, ‘Guztion prekaritatea borrokatu: Por un sindicalismo antirracista’ izeneko txostena eta auzi horretan jarduteko proposamenak eramango ditu gutxienez Nafarroako 350 enpresatako atal sindikaletara. Gogoratu beharra dago Nafarroan ELAren 102 ordezkarik eta 1.427 afiliatuk jatorri migratzailea dutela. Esaterako, Nafarroako Erriberan bost afiliatutik bat migrantea da.

Imanol Pascual, Nafarroako ELAko Koordinatzaileak esan duenez, “zenbait enpresak propio kontratatzen dituzte migratzaileak euren lan baldintzak areago prekarizatzeko eta euren etekinak puzteko, badakitelako kolektibo horren beharrizanak handiagoak direla. Migratzaileek lan merkatu prekarioagoan edo ezkutuan dihardute, eta irregulartasuna eta semiesklabotza sufirtzen dute. Langile migranteak antolatzea ere bada sindikatuaren lana. Borroka sindikalak behar ditu pertsona horiek, langile klaseko kide direlako, eta eurekin klase gisa indartsuagoak garelako”.

Pascualek kritikatu du Europar Batasunaren inguruko mitoetako bat askatasunen eremua dela, baina errealitateak erakusten du hori propaganda hutsa dela. 2005ean Europako Itunak "Europa gotorlekua" diseinatu zuen: EBtik kanpoko pertsonen migrazio eskubidea argi eta garbi urratzen duen sistema bat ezarri zen, eta, horren ondorioz, duela gutxi Migrazio eta Asilo Ituna sinatu da (2023ko amaiera). EBn kriminalizazioa da nagusi, elkartasunaren eta giza eskubideen errespetuaren aurretik. Europako finantziazioa immigrazioa atxikitzeko bideratzen da, eta ez immigrazioa integratzeko.

Saioa Urriza Ekintza Sindikaleko arduradunak nabarmendu duenez, “migratzaileen eskubideak egunero urratzen dira: etxebizitza izateko aukeretan, laguntza sozialetan, etab. Halaber, Nafarroan Errenta Bermatua jasotzeko onuradunak gutxienez 2 urte erroldatuta egon behar du; horrek kolektibo horren pobrezia iraunarazten du. Enplegu publikorako sarbidea ere migratzaile gehienentzat itxita dago, eta hezkuntzan sistema segregatzaile baten biktima dira”.

ELAk aurkeztu duen txostenean, diskriminazioa nagusi den errealitatea agertzen da. Adibidez, enpleguaren inguruko datuak oso larriak dira. Migratzaileek prekaritatea askoz ere gehiago pairatzen dute:

• Behin-behinekotasuna: Batez bestekoa % 21ekoa da; aldiz, migratzaileen artean % 57koa Nafarroan.

• Partzialtasuna: migratzaileen %21k du halako kontratu bat Nafarroan. Biztanleria okupatuaren batez bestekoa baino % 50 handiagoak 1 dira kopuru horiek.

• Soldata arrakala: Atzerritarren soldata ez direnena baino % 45,3 apalagoa da. Bi taldeon arteko arrakala 2021ean 12.625 eurokoa zen (urte horretakoak dira dauden azken datuak).

Aipatzen den errealitateaz mintzatzeko Nelly Nieto izan da prentsaurrekoan, Eurest enpresako ELAko ordezkaria, eta salatu du migratzaileak jasaten duten arrazakeria estrukturala da iristen diren unetik: “Migratzaileek pairatzen duten pobrezia migratzaile ez direnena baino bost aldiz handiagoa da”.

Imanol Pascuales eta Saioa Urrizak adierazi dutenez, “ELAren konpromisoa da sindikatu antirrazista izatea. Horrek lantokietako ekintza ere interpelatzen du. Prekaritatea borrokatzen ari gara, eta auzi horretan zeharkako faktoreak dira generoa eta arraza. Kanpainaren ardatz nagusia izango da konpromiso hori ELAko atal sindikalen bidez ehunka lantokietan gauzatzea, militanteak lan munduko arrazismoaren aurkako borrokan aktibatzeko. Sindikatuak enpresetan gertatzen diren diskriminazio kasuak hobeto atzeman nahi ditu, prekaritatearen kontrako borroka sindikala hobetzeko. Ekintza horiek eguneroko lan sindikalean txertatuko dira, migratzaileek pairatzen duten soldata arrakala desagerrarazteko, baita lan munduko kolektiborik zaurgarrienetako bat izateagatik jasaten dituzten gainerako baldintza prekarioak ere. ELAren aldarrikapenak honako hauek dira, besteak beste:

Europako Migrazio eta Asiloari buruzko Itunaren sinadura bertan behera uztea. • Frontex agentzia desegitea.

• Lehentasuna da giza eskubideak, eskubide ekonomiko, sozial eta kulturalak betetzea, ez enpresa eta kapitalenak. Merkataritza libreko Itunik ez. Herrien Itunaren defentsa. • Atzerritarren Legea indargabetzea.

• Pertsona guztien erregularizazio administratiboa, erroldatzeko eskubidea bermatuz.

• Jende guztiari eskubide berberak bermatzea, jatorri edota etniagatik diskriminaziorik gabe.

• Migrazio gaietarako eskuduntza osoak Hego Euskal Herriko erakundeentzat.

• Lan Ikuskaritzaren esku baliabide gehiago jarri irregulartasunak eta esplotazio kasuak atzemateko moduan izan dadin.

• Migratzaileen prestakuntzarako baliabideak (arrakala digitala, euskara, etab.).