ELAk lehen enpresa hitzarmena sinatu du, soldata igoerekin, lanaldi murrizketarekin eta lan eta hizkuntza eskubideen hobekuntzekin

ELAk Elmubasen (Azpeitia) lehen enpresa hitzarmen kolektiboa sinatu du. Akordio horrek langileen lan baldintzen hobekuntza nabarmena ekarriko du, orain arte aplikatzen zitzaien Estatuko sektore-hitzarmenarekin alderatuta.

Soldata-arloan, hitzarmenak diru sarrera txikienak dituzten langileei ematen die lehentasuna; izan ere, KPIaren igoeraz gain, hilean 100 euroko igoera lineala jasoko dute. Gainerako langileentzat, soldata-igoerak ezartzen dira: KPIa gehi % 3, KPIa gehi % 2 edo KPIa, soldata-mailaren arabera.

Akordioak urteko lanorduak murriztea ere aurreikusten du, lana eta bizitza pertsonala uztartzea errazteko, bai eta enpresak finantzatutako fisioterapia-orduak ere, langileen osasuna eta ongizatea hobetzeko.

Aurrerapen berritzaileenetako bat euskara plana da. Plan horri esker, euskara ikasi edo hizkuntza gaitasuna hobetu nahi duten langileek irakasleekin eta lanaldiaren barruan egin ahal izango dute, euskara ikastea ez dadin norberaren denbora librearen edo baliabide ekonomikoen araberakoa izan.

Gainera, euskarari lehentasuna emango zaio, bilerak euskaraz egingo dira eta langileek dokumentazioa euskaraz eskatu ahal izango dute.

Aurtengo urtera arte, Elmubasek ez du ordezkaritza sindikalik izan. Lehen hauteskunde sindikalak egiteak negoziazio kolektiboko prozesu bati ekiteko aukera eman zuen, eta prozesu hori, ELAren antolakuntzari eta babesari esker, lehen hitzarmen propioa sinatu da.