ELAk Lodosan atzo gertatatutako lan istripua salatu du

2015/03/24

ELA-k atzo Lodosan gertatutako lan-istripua publikoki salatu nahi du, bertan, ibilgailuan zeramatzan hainbat lasto-bloke gainera erorita kamio-gidari bat hilda suertatu delarik. Aurten Nafarroan lan-istripuan hil den lehen langilea da.

T.P.T. 55 urteko langilea, bulgariarra jatorriz eta Lizarran bizi zena, aipatu materiala jeisteko lanetan zebilen Lodosako “Las Machorras” industrialdeko “Germinados de Compost, S.L.” empresan.

Lehenik, ELA-k biktimaren senitarteko eta lankideei babes eta elkartasun osoa adierazi nahi die, istripuaren arrazoiak eta erantzukizunak argitzeko gertaeren berehalako ikerketa eskatzen duen aldi berean.

ELA-k gaitzespen osoa agertzen du, gehienetan sahiesgarriak diren gisa honetako lan-istripuak eragiten dituzten arrazoi nagusien artean, segurtasun-neurri gabeziak nahiz azpikontratazio kateek daukaten etengabeko presentziaren aurrean.

ELA-ren iritziz, esandakoa krisi ekonomikoaren aitzakian areagotzen ari den lan-baldintzen etengabeko prekarizazioaren ondorio da, langileriaren osasun-babeserako eskubidearen kaltean elkarte patronalen etekin ekonomizistak lehenesten diren honetan, eta Administrazio Publikoari dagozkion prebentzio-politika erreal eta eraginkorrak garatzen ez diren heinean.

Azkenik, ELA-k langileok pairatzen dugun ezbehar-kopuru handiaren oinarrian dagoen lan-prekarietatea desagertarazteko borrokan bere konpromezua berresten du.