eaeko langile publikoak

ELAk Madrilen presioa egitea eskatu die EAJri, EH Bilduri eta PSEri, lan-kontratuko langile publikoen erretiro partziala bermatzeko

2025/04/01
Eusko Jaurlaritzak eta euskal erakundeek ezin dute Estatua aitzakia gisa erabili hitzarmenak ez betetzeko, eta konponbidea bilatu behar dute; ELAk elkarretaratzea egingo du apirilaren 4an Bilboko Eusko Jaurlaritzaren egoitzaren aurrean. ELAk funtzionario eta estutarioen erretiro aurreraturako formulak ere eskatzen ditu; CCOOk eta UGTk Madrilen hartutako akordioak ez du benetako ondoriorik.

Eusko Jaurlaritzak erabaki du bere lan-kontratuko langileak erretiro partzialerako eskubiderik gabe uztea 2025eko apirilaren 1etik aurrera. Eusko Jaurlaritzak murrizketa hori azaltzeko Estatuko Gobernuak 11/2024 Errege Lege Dekretuaren bidez sartu zuen aldaketa erabili du.

Eusko Jaurlaritzaren erabakiak (tokiko erakunde batzuk ere bere gain hartzen ari dira), langile batzuk erretiro partziala hartzeko eskubiderik gabe uzten ditu, eta, gainera, alde bakarretik eta alternatibarik gabe urratzen ditu Eusko Jaurlaritzaren eremuko eta tokiko eremuko aplikazio-hitzarmenak. Euskal erakunde horiek Madrilen adostutako erabakien jarraipena egiten dute, Estatuko Gobernuaren eta gure herrialdean oso gutxiengoa diren sindikatuen artean. Horrek ondorio larriak ditu euskal langileen lan-baldintzetan.

ELAk azpimarratu du UGTk eta CCOOk estatutupeko langileen eta funtzionarioen erretiro aurreraturako sinatutako akordioek, gaur egun, ez dutela benetako ondoriorik, ezta ondorio praktikorik ere. Eusko Jaurlaritzak ahaztu egiten du erakundeek beren langileen erretiro aurreratua ahalbidetuko duten formulak martxan jar ditzaketela. Hala jasotzen du, adibidez, Hezkuntza Saileko sukaldeko eta garbiketako langileentzat sinatu berri den akordioak.

ELAk Eusko Jaurlaritzari, EUDELi eta euskal erakundeetan boterea duten alderdi politikoei eskatu die premiaz eman ditzatela beharrezko urratsak eskubideen murrizketa hori eraginkorra izan ez dadin eta lan-kontratuko langileek, estatutupeko langileek eta funtzionarioek erretiro partzial aurreratua hartu ahal izan dezaten. Zehazki, ELAk honako hau eskatu du:

  • Administrazio publikoetako lan-kontratuko langileek txanda-kontratuari heltzen jarraitu ahal izateko behar diren urratsak ematea.
  • Rajoyren Gobernuaren murrizketen aurreko errelebo-kontratuaren formula berreskuratzea. Hala ere, euskal erakundeak Madrildik datozen murrizketak errepikatzen ari dira, hobekuntzarik gabe.
  • Funtzionarioek eta estatutupeko langileek erretiro partzial aurreratua hartzeko benetako formulak ezartzea.

Helburu hori lortzeko, ELAk elkarretaratzea egingo du ostiral honetan, apirilaren 4an, 11:00etan, Eusko Jaurlaritzaren egoitzaren aurrean (Kale Nagusia 85, Bilbo), "Aurre erretiroa guztiontat, orain eta hemen" lelopean.