Iberdrola
ELAk manifestazioa egingo du bihar hitzarmenaren benetako negoziazioa eskatzeko
Iberdrolako langileak bihar (maiatzaren 17an) aterako dira Bilboko kaleetara, langileek erosahalmena galdu dutela eta enpresak hitzarmen duin batekin baldintzak berritzeko borondaterik ez duela salatzeko, nahiz eta enpresak etekin handiak izan. Horretarako, manifestazioa 12:00etan hasiko da Plaza Biribilean eta Iberdrola Dorrearen aurrean amaituko da.
Azken hitzarmena 2021ean sinatu zen, eta ordutik plantillak %16ko soldata galera pilatu du. Horregatik, ELAk lan baldintzak arautuko dituen hitzarmen bat negoziatzea eskatzen du, KPIaren araberako soldata berrikuspena txertatuko duena. Hala ere, Iberdrolak uko egin dio EAEn eta Nafarroan negoziatzeari (ELAk gehiengoa du bertan), eta estatuko hitzarmena soldata hobekuntzen bermerik gabe mantentzearen alde agertu da. ELAk azaldu du horrek erosahalmenaren galera handiagoa ekarriko duela, eta enpresako zuzendaritzari eskatu dio lan-baldintzak hobetzeko, etekinen arabera.