ELAk negoziazio autonomikoa aldarrikatu du Segurtasun Pribatuaren sektorean

2021/09/10
ELAk agiri bat aurkeztu du gaur Segurtasun Pribatuaren Estatuko Hitzarmen Kolektiboaren negoziazio mahaian Hego Euskal Herrian esparruak irekitzeko jarrera azalduz; izan ere, indar korrelazioa eta eragileen borondatea desberdinak dira EAEn eta Nafarroan.

Estatuko Hitzarmenaren negoziazioaren aurreko edizioek erakutsi dute langileen baldintzek atzera egin dutela, baldintza prekarioak eta atzerakoiak ezartzen baitira. Ez hori bakarrik, beheranzko birnegoziazio-prozesu batzuk egon dira sinatutako hitzarmena ez aplikatzeko.



Ildo horretan, sindikatuak ez du onartzen estatu-eremua propioa denik, eta negoziazioaren joko-arauekiko errespetu faltatzat hartzen ditu estatuaz bestelako eremuetan negoziatzeko aukera ukatzen duten eragileek hartzen dituzten jarrerak.

Horregatik guztiagatik, ELAk hitzarmeneko artikulua kentzea eskatzen du, hau da, aldeek beheragoko eremuetan ez negoziatzeko konpromisoa hartzea, uste baitu EAEren eremua eta Nafarroaren eremua direla egokienak Hego Euskal Herriko sektoreko lan-baldintzak arautzeko. Gainera, sektoreko langile guztiak gonbidatzen ditu gaur egun dauden prekarietatearekin eta baldintza atzerakoiekin amaituko den hitzarmen autonomiko baten aldeko borrokarekin bat egitera.