ELAk premiazko neurriak eskatu ditu lan-ezbeharren aurrean, Hernaniko Zikuñaga paper-fabrikan garraiolari bat hil ondoren

2022/05/03
Papelera Zikuñagan (Hernani) gertatutako garraiolari baten heriotzaren aurrean, ELAk plantillen segurtasuna diru-etekinen aurretik lehenestea eta lan-baldintzak kontrolatzeko bitarteko publikoak areagotzea eskatu du. ELAk jakin ahal izan duenez, 69 urteko garraiolari bat hil da gaur goizean Hernaniko (Gipuzkoa) Eziago industrialdeko ibaiaren pareko aparkalekuan kamioiak harrapatuta. Lehenik eta behin, ELAk babesa eta elkartasuna adierazi nahi die biktimaren gertuko pertsona guztiei, eta, aldi berean, ezbeharraren zergatiak eta erantzukizunak argitzeko nahitaezko ikerketa egitea eskatzen du.

Gipuzkoan 2022an hil den zortzigarren langilea da, 24.a Hego Euskal Herrian. Lan-istripuak % 10 baino gehiago igo dira azken urtean eta egunero 235 pertsonak izaten dute lan-istripu bat. Egoera oso larria da, eta ez da kasualitatea. Zuzeneko lotura du desinbertsioarekin, prestakuntzarik ezarekin eta prebentzio eta babes-neurri egokirik ezarekin.

Patronalak ordea, lan-erreformak ez indargabetzeaz baliatzen jarraitzen du prekarietatea bultzatzeko, lan-baldintzak oro har hobetuz ezbehar-tasak murriztea bere esku dagoen honetan. Baina patronala oso eroso dago, Eusko Jaurlaritzaren adostasuna baitu. Gobernu honek beste alde batera begiratzen jarraitzen du, lan-osasunera baliabide urriak bideratuz, bitartean, Osalan eta Lan Ikuskaritza ia kolapsoan daudelarik, bitarteko faltagatik.

Horren aurrean, ELAk eskatzen du plantillen segurtasuna lehenestea onura ekonomikoaren aurrean, eta lan-baldintzak kontrolatzeko bitarteko publikoak areagotzea, eta, aldi berean, langileak mobilizatzera deitzen ditu, hiltzen eta gaixotzen gaituen prekarietatearen aurka eta lanetik etxera bizirik itzultzeko eskubidea defendatzeko.