ELAk salatu du Arabako Etxez etxeko Laguntza Zerbitzuaren akordioa gutxiengoan sinatu izana

ELA sindikatuak, Arabako etxez etxeko zerbitzuaren sektorean % 46ko ordezkaritza izanik, erabat errefusatzen du CCOOk eta patronalak lortutako aurreakordioa. CCOOk gehiengo nahikorik ez duenez, hitzarmen berriak ez du indarraldi orokorrik izango. Akordio hori negatiboki baloratzen dugu, bai baldintzengatik, bai ituna lortzeko moduengatik.

Akordio horrek nabarmen murrizten ditu Arabako ELZko langileen lan-baldintzak. Azken urteetako inflazioa kontuan hartuta, akordioak sektorearen pobretze argia ekarriko du. Soldaten atalean, akordioak honako hau jasotzen du: 2021erako % 0ko igoera, 2022rako % 1ekoa eta 2023rako % 1ekoa gehi % 3koa urriaren 1etik, atzeraeraginik gabe.

Gainera, akordioak % 13 jasotzen du 2024rako (noiz izango diren ez dakigu esleipenei lotuta baitago, beraz, ez dago aplikazio-datarik), eta % 3,75 2025erako. Hori guztia erosteko ahalmena bermatuko duen azken klausularik gabe, gehienez 2,5ekoa izango dela adostu baita.

ELAk negoziazioaren lehen egunetik defendatu du soldatak KPIari lotutako eguneratzea izan behar zutela, eta horixe defendatzen jarraitzen dugu gaur egun ere. Patronalaren eta administrazio publikoen xantaiarik ez dugu onartu, ezta onartuko ere, negoziazio honetan jasan ditugunak bezalakoak.

Gaur lortutako itunak ez ditu jasotzen, bestalde, sektoreko langileentzat funtsezkoak diren hainbat gai: soldata-bermea handitzea, lizentziak eta baimenak hobetzea, aldi baterako ezintasunen osagarriak eta aparteko hobariak nabarmen handitzea, besteak beste.

Gogorarazi nahi dugu langileen ordezkaritzaren gutxiengo batek sinatu duela akordio hau, eta, beraz, edozein negoziazio bideratu beharko lukeen gutxieneko demokratikoa gainditu dela. ELAk Gipuzkoako egoitzetan UGTk sinatutako akordioan adierazi genuen bezala, jarduera antidemokratiko horiek Foru Aldundiek baimentzen eta babesten dituzte, zaintza lanak enpresa pribatuen esku egoten jarraitzeko aukera ematen baitute.