ELAk salatu du Bizkaibusek erretiroa ukatu diola langile bati, beste kolektiboen lanpostuak amortizatzen dituen bitartean

2020/08/25
Grupo Avanza Durangaldea Bizkaibus enpresak (Bizkaiko Foru Aldundiaren azpikontrata) erretiro partziala ukatu dio langile bati, eta udarako aprobetxatu du lanpostu bat amortizatzeko; langile horrek 25 urte baino gehiago ditu Bizkaibuseko autobusak gidatzen, eta erretiro partziala hartzeko baldintzak bete baditu ere, eskaera ukatu diote.

Orain dela aste batzuk arte, adinera iritsi eta baldintzak betetzen zituzten langile guztiak erretiroa hartzen ari ziren. Alabaina, Avanza taldeak duela 6 urte baino gehiago Pesa taldea erosi zuenetik, baldintzak murrizten hasi da. Bizkaibuseko zerbitzua arriskuan ere jartzen du, enpresa honek bere plantilla berritzen zuelako langileak eskatutako baldintzetan.
ELAk uste du erabaki hori Bizkaibuseko langileen aurkako eraso zuzena dela. Enpresak marra gorri bat gainditu du erretiroa ukatuz: ez ditu betetzen aplikazio-hitzarmena ezta ohiko jarduna ere.
Horregatik guztiagatik, Bizkaiko Foru Aldundiari eskatzen diogu (zerbitzuaren kalitatearen arduraduna baita) lizitazio-pleguak eta esleitutako partidak berrikustea, eta enpresa behartzea langile honi erretiroa hartzeko aukera emateko.

Epe labur batean baldintza hauek ez baldin badira betetzen, ELAk beharrezkoak diren neurriak hartuko ditu oinarrizko eskubide hau defendatzeko.