ELAk salatu du gutxienik Bizkaiko erresidentzietako lan-hitzarmena aplikatzeko akordioa bihar amaitzen dela

2016/09/29
Unai Rementeria Diputatu nagusiak atzo Gernikan izan zen Batzar Nagusien batzarrean esan zuen hirugarren adineko egoitzen lehiaketa esleitzerakoan lan-baldintzak aintzat hartuko direla. Bada, ELAk ohartarazi nahi du lizitazioetan gutxienik lan-hitzarmen sektoriala aplikatuko zela ezarri zuen akordioa bihar, hilak 30, iraungitzen dela; halere, foru-gobernuko arduradunek langileen ordezkariekin ez dute harremanik izan akordio hori hitzartu eta berritzeko.

ELAren aburuz, greba eragin duen arrazoietako bat da lan-hitzarmen sektoriala gutxieneko gisa bermatzea, erreforma laboralaren ostean hitzarmenak berak ez baitu aplikatuko denik ziurtatzen. Duela bi urte alde sozialak eta Aldundiak hitzartu zuten gutxieneko baldintzak lan-hitzarmenaren araberakoak izango zirela, oheak lizitatzerakoan ezarritako klausula baten bidez. Haatik, gaur arte kontu hau argitze aldera Aldundiak ez du harremanik izan alde sozialarekin, eta kolektiboan zalantza hedatu da.

Azkenik, ostiral honetan sektoreko beharginak berriro kaleratuko dira, Aldundiari eta patronalei exijitzeko beren eskariak aintzat har ditzatela: plantillak gehitu, ratioak aldatu, lan-kargak arindu eta kolektiboaren lan-baldintzak hobetzea.

Manifestazioa goizeko 11.45etan hasiko da Plaza Zirkularretik; bertan elkartuko dira Udaletxetik, Arriaga plazatik eta Zabalburutik abiatuko diren hiru zutabeak.