Enpleguaren egoerak ez du hobera egingo politikak aldatzen ez diren bitartean

2014/02/04
Enplegu Zerbitzu Publikoak gaur argitaratu dituen datuen arabera Hego Euskal Herrian (HEH) 227.334 pertsona izan dira langabezian urtarrilean, abenduan baino 8.472 gehiago eta duela urte bete baino 3.544 gutxiago. Honela langabezia tasa %17,6an kokatzen da, EB-28koa baino 6,9 puntu altuagoa.

Langabezian izena emandakoen kopurua azken urtean jaitsi izanak ez du suposatzen enplegua sortu denik. Hau jendeak lana bilatzerako orduan duen itxaropen ezagatik eta askok eta askok langabezia saria jasotzeko eskubiderik ez dutenez, langabezia zerrendetan ez dutelako izenik ematen gertatzen da.

Hala eta guztiz ere, langabetuen %48k ez dute inolako langabezia prestaziorik jasotzen. Eta kotizaziopeko langabezia saria jasotzen dutenak 3tik 1 baino gutxiago dira. Hau da diru kopuru altuena duen prestazioa (929,9 euro bataz beste EAEn eta 927,5 euro bataz beste Nafarroan pasa den abenduan). Bestalde, %20,8k gizarteratze errenta edo subsidioa jasotzen du, kotizaziopeko prestazioak baino diru kopuru askoz txikiagoa suposatzen duena.

Gainera azken urtean langabezia prestazioen gastua %11,9 jaitsi da HEHan murrizketa eta doitze politiken ondorioz, 17,2 milioi euro gutxiago suposatzen du honek.

Honen aurrean instituzioetatik bi aukera dituzte; egoera mozorrotzen saiatu, langabezia jaisten ari dela argudiatuz gizartea engainatzeko asmoarekin, edo kondizio honetara eraman gaituzten eta jendea pobrezian itotzen ari diren politikak aldatu.

Gizartearen eta enpleguaren egoera okerrera doa oraindik ere HEHan, eta bakarrik antolakuntza eta borrokaren bidez lortuko dugu egoera honetara bideratu gaituzten politikak aldatzea.