Enpresaren itxieraren aurka dago ELA

ELAk arbuiatu nahi du atzo Zestoako GRI Casting enpresak iragarritako itxiera planteamendua. Enpresa Batzordeari (ELA 4, LAB 1) egindako jakinarazpenaren bidez, zuzendaritzak langile guztiak kaleratzeko prozedura hasi zela jakinarazi zuen.

ELAk harriduraz hartu du erabaki hori, eta salatu nahi du Gonvarri Taldea ez dela gai 2015ean erosi zuen enpresari lan karga eta norabide koherentea emateko.

Ezintasun horren eta enpresa erabakiak sostengatzeko argudio ezaren froga izan zen ERTEa, 2022ko irailean Donostiako Lan Arloko 5 zenbakiko Epaitegiak baliogabetzat jo zuena, justifikaziorik gabea izateagatik.

ELAk borroka egingo du enpresaren erabakia iraultzeko, enplegua eta Zestoako lantokiaren industria proiektua defendatzeko. Erakundeen laguntza ere eskatzen du. Industria politika proban jartzen da GRI Castingsen moduko egoeretan; propaganda gutxiago eta neurri eraginkor gehiago behar dira.