Eskualderako ospitale %100 publikoa eta zerbitzu guztiekin aldarrikatu dute

Eusko Jaurlaritzak 2023an aurkeztutako plan funtzionalak ez die erantzuten eskualdeko beharrei, eta ez ditu jasotzen herritarren eta osasun langileen aldarrikapenak. Ez du funtsezko zerbitzurik, hala nola ospitaleratutako kirurgia, pediatriako larrialdiak, obstetrizia, garbiketa eta sukaldea, eta ez du bermerik eskaintzen egungo langileen etorkizunari buruz.

Egoera honen aurrean, ELA eta LAB mobilizatu egin dira ospitale %100 publikoa aldarrikatzeko, beharrezko zerbitzu guztiekin, Asunción klinikako langileen subrogazioa bermatzeko eta Alberto Martínez Osasun sailburuak langileen batzordearekin premiazko bilera bat deitzeko.

LABek eta ELAk dei egin diete herritar guztiei eta Asunción klinikako langileei, ekainaren 14an, 12:00etan, Tolosako Triangeluan, Tolosalderako kalitatezko osasun publikoa defendatzen jarraitzeko mobilizazioan parte hartzera.