Aurrekontuetako gastua ez da haziko Espainiako Gobernua eta Unidos Podemosen arteko akordioaren ostean
ELAk gogoratu du sinatu dena legegintzaldirako akordioa dela, 2019ko aurrekontuetatik haratago doana. Akordioak ez du 2019ko aurrekontuetan aldaketarik eragingo; azken urteetako ildoari jarraituko zaio. Espainiako Gobernuaren gastu-aurrekontuan ez da aldaketarik izango, akordioaren aurretik zein ondoren.
Pedro Sanchezen gobernuak eta Unidos-Podemosek “2019ko Estatuko Aurrekontu Orokorren Akordioa” delakoa sinatu dute. Izena gorabehera, berez legegintzaldirako akordio bat dela esan daiteke; puntu nagusiak aurrekontuen eztabaidatik kanpo geratzen dira (bere legegintza-bideak dituzte, esaterako lan erreformak edota gutxieneko soldatak). Pentsioetan ere akordioa oso urria da. Egonkortasun Faktorea mantentzen da; ez zaio helduko gutxieneko pentsioen duintzeari, eta murrizketa handi batuk ez dira bertan behera geratuko (pentsio berriek jasango dutena, edota erretiro adina atzeratzea).