Europar Batasunaren joera belizista salatu dute eragile sozial eta sindikalek Bilbon

`Europa mata. Harresien, gerren eta genozidioaren kontra!´ lelopean, Euskal Herriak Kapitalari Planto! plataformak salatu du "Europar Batasunak rol aktiboa duela mundu mailako gerra erregimenean". Bilboko Moyua plazan egindako elkarretaratzean, eragile sozial eta sindikalek adierazi dute "agerian geratu dela mito hutsa dela Europar Batasuna bakean, giza eskubideetan eta kohesio sozialean oinarritzen dela". Europako hauteskundeen atarian egin dute ekitaldia eta belizismoaren gorakada salatu dute. "EBk eta bere eliteek gizateriaren etorkizuna arriskuan jartzeaz gain, botere korporatiboaren alde egiten dute; bide beretik, Euskal Herriko eta nazioarteko langileen interesen aurka doan joera belizistaren parte dira" adierazi dute.